ട്രെയിന്‍ യാത്രയ്ക്കിടെ വീണ് പരിക്കേല്‍ക്കുകയോ മരിക്കുകയോ ചെയ്യുന്നവര്‍ക്ക് റയില്‍വേ തന്നെ നഷ്ട പരിഹാരം നല്‍കണമെന്ന് സുപ്രീം കോടതി. ഇത് യാത്രക്കാരുടെ അശ്രദ്ധയായി കണ്ട് കയ്യൊഴിയരുതെന്ന് ജസ്റ്റിസ് എകെ ഗോപാലനും ആര്‍എഫ് നരിമാനും നേതൃത്വം നല്‍കിയ ബഞ്ച് പറഞ്ഞു. മനപ്പൂര്‍വ്വം ആരും വരുത്തി വെയ്ക്കുന്ന അപകടമല്ല ഇത്. 

ഒട്ടും വിചാരിക്കാതെ വരുന്നതാണ് അതിനാല്‍ പൂര്‍ണ്ണമായും യാത്രക്കാരെ കുറ്റം പറഞ്ഞ് ഒഴിവാക്കരുത്, ബഞ്ച് പറഞ്ഞു. 124 എ 1989 നിയമപ്രകാരം ട്രെയിനില്‍ നിന്ന് വീണ് മരിക്കുകയോ പരിക്കേല്‍ക്കുകയോ ചെയ്യുന്നവര്‍ക്ക് റയില്‍വേ നഷ്ടപരിഹാരം നല്‍കേണ്ട എന്നായിരുന്നു. മനപ്പൂര്‍വ്വം ആത്മഹത്യയ്ക്ക് ശ്രമിക്കുന്നവരും ഇതിലുള്‍പ്പെടും എന്നതാണ് പ്രധാനമായും ചൂണ്ടികാട്ടിയിരുന്നത്. 

എന്നാല്‍ കയറുകയോ ഇറങ്ങുകയോ ചെയ്യുന്നതിനിടെ സംഭവിക്കുന്ന അപകടം ഈ ഗണത്തില്‍പ്പെടുത്താനാവില്ലെന്ന് പല ഹൈക്കോടതികളും നേരത്തേയും അഭിപ്രായപ്പെട്ടെങ്കിലും നിയമഭേദഗതി കൊണ്ടു വരാന്‍ സാധിച്ചിട്ടില്ല. എന്നാല്‍ പുതിയ ബഞ്ച് നിര്‍ദേശപ്രകാരം അപകടങ്ങള്‍ക്ക് റയില്‍വേ ഉത്തരവാദിയായിരിക്കും. അതിനാല്‍ നഷ്ടപരിഹാരം നല്‍കിയിരിക്കണം.