അജ്ഞാതരുടെ തോക്കിനിരയായ മുതിര്‍ന്ന മാധ്യമപ്രവര്‍ത്തക ഗൗരി ലങ്കേഷിന്റെ സഹോദരന്‍ ബിജെപിയുടെ തിരഞ്ഞെടുപ്പ് പ്രചരണത്തിന്. ബിജെപി അനുകൂലികളാണ് ഗൗരി ലങ്കേഷിനെ കൊലപ്പെടുത്തിയത് എന്ന ആരോപണം നിലനില്‍ക്കുന്ന സാഹചര്യത്തില്‍ ബിജെപിയുടെ സ്ഥാനാര്‍ത്ഥി ഡോ. അശ്വന്ത് നാരായണന് വേണ്ടിയാണ് ഇന്ദ്രജിത് ലങ്കേഷ് പ്രചരണത്തിനിറങ്ങിയത്. ബംഗളൂരുവിലെ മല്ലേശ്വരം മണ്ഡലത്തിലെ സ്ഥാനാര്‍ത്ഥിയാണ് അശ്വന്ത്.

സഹോദരിയുടെ മരണത്തില്‍ കൊലപാതകികളെ നിയമത്തിന് മുന്നില്‍ കൊണ്ട് വരാന്‍ സിദ്ധരാമയ്യ സര്‍ക്കാര്‍ പരാജയപ്പെട്ടെന്ന് ഇന്ദ്രജിത് ലങ്കേഷ് ആരോപിച്ചു. പ്രധാനമന്ത്രി നരേന്ദ്ര മോദിയുടെ ആശയങ്ങളില്‍ ആകൃഷ്ടനാണെന്ന് പറഞ്ഞ ഇന്ദ്രജിത്, മികച്ച പ്രതിച്ഛായയുള്ള അശ്വത് നാരായണ്‍ മല്ലേശ്വരം മണ്ഡലത്തില്‍ വന്‍ ഭൂരിപക്ഷത്തോടെ വിജയിക്കുമെന്നും അഭിപ്രായപ്പെട്ടു.

സംഘപരിവാറിനെതിരെ ആരോപണങ്ങള്‍ ഉയര്‍ന്നിരുന്ന വധത്തില്‍ തീവ്ര ഇടതു സംഘടനകളുടെ പങ്കിനെക്കുറിച്ചു സംശയമുള്ളതായി അദ്ദേഹം പറഞ്ഞു. ഗൗരി ലങ്കേഷിന്റെ മരണത്തിന്റെ ഉത്തരവാദിത്തത്തില്‍ നിന്ന് സിദ്ധരാമയ്യ സര്‍ക്കാരിന് ഒഴിഞ്ഞു മാറാനാകില്ലെന്നും അദ്ദേഹം പറഞ്ഞു.

ഏഴ് മാസങ്ങള്‍ക്ക് മുന്‍പ് ബംഗളൂരുവിലെ രാജരാജേശ്വരി നഗറിലെ വസതിക്ക് മുന്നില്‍ വച്ച് ബൈക്കിലെത്തിയ അജ്ഞാതസംഘത്തിന്റെ വെടിയേറ്റാണ് ഗൗരി ലങ്കേഷ് മരിച്ചത്.