നേപ്പാള്‍ ഇല്ലാതെ ഇന്ത്യയുടെ വിശ്വാസങ്ങളും ചരിത്രവും ക്ഷേത്രങ്ങളും പൂര്‍ണമാകില്ലെന്നും നേപ്പാളില്ലാതെ ഭഗവാന്‍ രാമന്‍ പൂര്‍ണനാകില്ലെന്നും പ്രധാനമന്ത്രി നരേന്ദ്രമോദി. തന്റെ രണ്ട് ദിവസത്തെ നേപ്പാള്‍ സന്ദര്‍ശനത്തിന്റെ ഭാഗമായി അയോധ്യയെയും ജാനക് പുരിനെയും തമ്മില്‍ ബന്ധിപ്പിക്കുന്ന ബസ് സര്‍വീസിന്റെ ഫ്‌ളാഗ് ഓഫ് നിര്‍വഹിച്ചതിന് ശേഷം സംസാരിക്കുകയായിരുന്നു അദ്ദേഹം. ഹിന്ദുമത വിശ്വാസ പ്രകാരം രാമന്റെ ജന്മസ്ഥലമാണ് അയോധ്യ. നേപ്പാളിലെ ജാനക്പുര്‍ സീതയുടെ ജന്മസ്ഥലവും. ഇത് പരോക്ഷമായി പരാമര്‍ശിച്ചാണ് മോദിയുടെ പ്രസംഗം.

രാമായണ സര്‍ക്യൂട്ട് എന്നപേരില്‍ ആവിഷ്‌കരിച്ചിട്ടുള്ള ആധ്യാത്മിക വിനോദ സഞ്ചാര പദ്ധതിയുടെ ഭാഗമാണ് ജാനക് പുര്‍- അയോധ്യ ബസ് സര്‍വീസ്. നൂറ്റാണ്ടുകളുടെ ബന്ധമാണ് അയോധ്യയും ജാനക്പുരും തമ്മിലുള്ളതെന്നും അത് തകര്‍ക്കാനാകാത്തതാണെന്നും മോദി പറഞ്ഞു. 225 കിലോമീറ്റര്‍ വരുന്ന ബസ് സര്‍വീസ് മോദിയും നേപ്പാള്‍ പ്രധാനമന്ത്രി കെ.പി. ശര്‍മ ഒലിയും ചേര്‍ന്നാണ് ഫ്‌ളാഗ് ഓഫ് ചെയ്തത്.

അയല്‍രാജ്യങ്ങള്‍ക്ക് പ്രഥമപരിഗണന എന്ന നയത്തില്‍ നേപ്പാളിനെയാണ് ഇന്ത്യ ആദ്യം പരിഗണിക്കുന്നതെന്നും മോദി പറഞ്ഞു. മോദിയുടെ സന്ദര്‍ശനത്തിന്റെ ഭാഗമായി രണ്ടുരാജ്യങ്ങളില്‍ നിന്നുമുള്ള 11,000 സുരക്ഷാ ഉദ്യോഗസ്ഥരെയാണ് നേപ്പാളില്‍ വിന്യസിച്ചിരിക്കുന്നത്.

ഇന്ന് തലസ്ഥാനമായ കാഠ്മണ്ഡുവിലെ പ്രശസ്തമായ പശുപതിനാഥ് ക്ഷേത്രത്തില്‍ മോദി പ്രാര്‍ഥന നടത്തും. കൂടാതെ കെ.പി. ശര്‍മ ഒലിയുമായി ഔദ്യോഗിക ചര്‍ച്ചകള്‍ നടത്തും. നേപ്പാള്‍ പ്രസിഡന്റ്, വൈസ് പ്രസിഡന്റ്, പ്രമുഖ രാഷ്ട്രീയ നേതാക്കള്‍ എന്നിവരുമായും മോദി കൂടിക്കാഴ്ച നടത്തുമെന്നാണ് വിവരം.

ഇന്ത്യയുടെ സഹായത്തോടെ സംഘുവസഭാ ജില്ലയില്‍ നിര്‍മിക്കുന്ന ജലവൈദ്യുത പദ്ധതിയുടെ നിര്‍മാണോദ്ഘാടനവും ഇരുപ്രധാനമന്ത്രിമാരും ചേര്‍ന്ന് നിര്‍വഹിക്കും.

ശനിയാഴ്ച മുക്തിനാഥ് ക്ഷേത്രം സന്ദര്‍ശിക്കുന്ന മോദി ക്ഷേത്രത്തിന്റെ വികസനത്തിനായി സഹായം വാഗ്ദാനം ചെയ്യുമെന്നാണ് കരുതുന്നത്. ഇത് മുന്നാം തവണയാണ് മോദി നേപ്പാള്‍ സന്ദര്‍ശിക്കുന്നത്. പുതിയ സര്‍ക്കാര്‍ വന്നതിന് ശേഷം ആദ്യത്തെ സന്ദര്‍ശനവും.