ക്ലീന്‍ ഗംഗാ പദ്ധതി ഫണ്ടിലേക്ക് പ്രധാനമന്ത്രിയുള്‍പ്പെടെയുള്ളവരുടെ ഒരു മാസത്തെ ശമ്പളം സംഭാവന ചെയ്യണമെന്നാവശ്യപ്പെട്ട് രാഷ്ട്രപതിക്ക് കത്തയക്കുമെന്ന് കേന്ദ്രമന്ത്രി നിതിന്‍ ഗഡ്കരി പറഞ്ഞു. ഗംഗാ നദീ ശുചീകരണം ലക്ഷ്യമിട്ട് മോദി സര്‍ക്കാര്‍ ആവിഷ്‌കരിച്ച സ്വപ്ന പദ്ധതിയാണ് നാഷണല്‍ ക്ലീന്‍ ഗംഗാ മിഷന്‍.

എംഎല്‍എ, എംപി, എന്നിവര്‍ക്ക് പുറമെ, പ്രധാനമന്ത്രിയോടും തങ്ങളുടെ ഒരുമാസത്തെ ശമ്പളം ഗംഗാ ശുചീകരണ ഫണ്ടിലേക്കായി നല്‍കാന്‍ അഭ്യര്‍ത്ഥിച്ചിട്ടുണ്ട്. ഇത് സംബന്ധിച്ച്‌ രാഷ്ട്രപതിക്ക് ഉടന്‍തന്നെ കത്ത് നല്‍കും. വ്യക്തികള്‍ക്കും മറ്റ് സംഘടനകള്‍ക്കും ഫണ്ടിലേക്ക് സംഭാവന നല്‍കാമെന്നും ഗഡ്കരി വ്യക്തമാക്കി. 300 രൂപ വരെ ഫണ്ടിലേക്ക് സംഭാവന തന്ന വ്യക്തികള്‍ ഉണ്ടെന്നും, എത്രയാണോ ഓരോരുത്തര്‍ക്കും നല്‍കാന്‍ സാധിക്കുക അത് നല്‍കിയാല്‍ മതിയെന്നും മന്ത്രി കൂട്ടിച്ചേര്‍ത്തു.

2014 ല്‍ പദ്ധതിക്ക് കേന്ദ്രമന്ത്രിസഭ അനുമതി നല്‍കിയത് മുതല്‍ 250 കോടി രൂപ ക്ലീന്‍ ഗംഗാ ഫണ്ടിലേക്ക് എത്തിച്ചേര്‍ന്നിട്ടുണ്ടെന്നും, 2019 ഓടെ ഗംഗാ നദീജലത്തിന്റെ 80 ശതമാനവും ശുചീകരിക്കണമെന്നും ഗഡ്കരി പറഞ്ഞു. 2014 ല്‍ ബിജെപിയുടെ മുഖ്യ തെരഞ്ഞെടുപ്പ് വാഗ്ദാനങ്ങളില്‍ ഒന്നായിരുന്നു ഗംഗാ ശുചീകരണം.

അതേസമയം ക്ലീന്‍ ഗംഗാ പദ്ധതിക്കായി അനുവദിച്ച 20000 കോടി രൂപയുടെ 20 ശതമാനം മാത്രമാണ് 2018 മാര്‍ച്ച്‌ വരെ ചെലവഴിച്ചതെന്ന് കഴിഞ്ഞ ദിവസം 'ദി ഹിന്ദു' റിപ്പോര്‍ട്ട് ചെയ്തിരുന്നു. 2018 മാര്‍ച്ച്‌ വരെയുള്ള കണക്ക് പ്രകാരം 193 പദ്ധതികള്‍ക്കായി നല്‍കിയ 20601 കോടി രൂപയില്‍ 4,254 കോടി രൂപ മാത്രമാണ് ഉപയോഗിച്ചത്. ഇതില്‍ 2814 കോടി രൂപയും അഴുക്കുചാല്‍ സൗകര്യങ്ങള്‍ മെച്ചപ്പെടുത്തുന്നതിന് വേണ്ടിയാണ് ചെലവഴിച്ചിട്ടുള്ളതെന്നും റിപ്പോര്‍ട്ടില്‍ പറയുന്നുണ്ട്.