സംസ്ഥാനത്തെ ഇനി ആര് മുന്നോട്ട് നയിക്കണമെന്നതില്‍ കര്‍ണാടകയിലെ ജനം ഇന്ന് വിധിയെഴുതും. രാവിലെ ഏഴു മാണി മുതല്‍ വൈകിട്ട് ആറു വരെയാണ് വോട്ടെടുപ്പ്. വോട്ടെടുപ്പ് അവസാനിക്കുന്നതോടെ എക്‌സിറ്റ് പോള്‍ ഫലങ്ങളും എത്തി തുടങ്ങും.

224 ല്‍ 222 മണ്ഡലങ്ങളിലേക്കാണ് ഇന്നു വോട്ടെടുപ്പ് നടക്കുന്നത്. ബിജെപി സ്ഥാനാര്‍ഥിയുടെ മരണംമൂലം ജയനഗര മണ്ഡലത്തിലെയും, തിരിച്ചറിയല്‍ കാര്‍ ഡുകള്‍ പിടിച്ചെടുത്തതിനെത്തുടര്‍ന്ന് ആര്‍ആര്‍ നഗറിലെയും വോട്ടെടുപ്പ് മാറ്റിവച്ചിരിക്കുകയാണ്. ഭരണകക്ഷിയായ കോണ്‍ഗ്രസും ബിജെപിയും തമ്മില്‍ ഇഞ്ചോ ടിഞ്ച് മത്സരമാണു നടക്കുന്നത്. സ്വാധീനം നിലനിര്‍ത്താന്‍ ജെഡിഎസും ശക്തമായി രംഗത്തുണ്ട്. ചൊവ്വാഴ്ച വോട്ടെണ്ണും. 

1985ല്‍ രാമകൃഷ്ണ ഹെഗ്‌ഡെയുടെ നേതൃത്വത്തില്‍ ജനതാ പാര്‍ട്ടി അധികാരം നിലനിര്‍ത്തിയതിനു ശേഷം കര്‍ണാടകത്തില്‍ ഒരു കക്ഷിയും തുടര്‍ച്ചയായി അ ധികാരത്തിലെത്തിയിട്ടില്ല. മുഖ്യമന്ത്രി സിദ്ധരാമയ്യയുടെ നേതൃത്വത്തില്‍ കോണ്‍ഗ്രസും മുന്‍ മുഖ്യമന്ത്രി ബി.എസ്. യെദിയൂരപ്പയുടെ നേതൃത്വത്തില്‍ ബിജെപിയും തികഞ്ഞ ആത്മവിശ്വാസത്തിലാണ്. കര്‍ണാടകത്തില്‍ തൂക്കുസഭയായിരിക്കുമെന്നാണു വിവിധ തെരഞ്ഞെടുപ്പു സര്‍വേകള്‍ പറയുന്നത്.

ഏതാനും സര്‍വേകള്‍ കോണ്‍ഗ്രസ് മുന്നിലെത്തുമെന്നു പറയുന്നുണ്ട്. തൂക്കുസഭയാണെങ്കില്‍ ജെഡിഎസ് പിന്തുണയോടെ ബിജെപി അധികാരത്തിലെത്താനാണു സാധ്യത. 150 സീറ്റ് നേടുമെന്ന് ആദ്യം പറഞ്ഞിരുന്ന ബിജെപി അധ്യക്ഷന്‍ അമിത് ഷാ ഇപ്പോള്‍ പറയുന്നത് 130 സീറ്റ് നേടുമെന്നാണ്. മത്സരം കടുത്തതാണെന്ന് ഇതില്‍നിന്നു വ്യക്തമാണ്. 113 സീറ്റാണു കേവല ഭൂരിപക്ഷത്തിനു വേണ്ടത്.