ബംഗ്ലാദേശിന്റെ തലസ്ഥാനമായ ധാക്കയുടെ ആകാശത്ത് ഇന്ത്യന്‍ വിമാനങ്ങള്‍ നേര്‍ക്കുനേര്‍ വന്നു. പക്ഷെ തലനാരിഴയ്ക്ക് കൂട്ടിയിടിക്കാതെ രക്ഷപ്പെട്ടു . ഇന്‍ഡിഗോ എയര്‍ബസ് എ320യും എയര്‍ ഡെക്കാന്റെ ബീച്ച് ക്രാഫ്‌റ്‌റ് 1900ഡിയുമാണ് ആകാശത്ത് നേര്‍ക്കുനേര്‍ വന്നത്. ഇരുവിമാനങ്ങളും നേര്‍ക്കുനേര്‍ എത്തിയപ്പോള്‍ ഓട്ടോമാറ്റിക്കായി ലഭിച്ച മുന്നറിയിപ്പ് സന്ദേശമാണ് വന്‍ ദുരന്തമൊഴിവാക്കാന്‍ പൈലറ്റുമാര്‍ക്ക് സഹായകമായത്. 
ഇക്കഴിഞ്ഞ മേയ് രണ്ടിനായിരുന്നു സംഭവമുണ്ടായത്. ഗുരുതരം എന്നു വിശേഷിപ്പിച്ച സംഭവത്തിന്റെ കൂടുതല്‍ വിവരങ്ങള്‍ ഇപ്പോഴാണ് പുറത്തു വരുന്നത്. ഇതിന്മേല്‍ അന്വേഷണവും ആരംഭിച്ചു. വിമാനങ്ങള്‍ തമ്മില്‍ വെറും 700 മീറ്റര്‍ മാത്രം വ്യത്യാസമുള്ളപ്പോഴായിരുന്നു അലേര്‍ട് ലഭിച്ചത്. കൊല്‍ക്കത്തയില്‍ നിന്ന് അഗര്‍ത്തലയിലേക്ക് പോകുകയായിരുന്നു ഇന്‍ഡിഗോയുടെ 6ഇ892 വിമാനം. അഗര്‍ത്തലയില്‍ നിന്നു കൊല്‍ക്കത്തയിലേക്കുള്ള യാത്രയിലായിരുന്നു എയര്‍ ഡെക്കാന്റെ ഡിഎന്‍602 വിമാനം. 9000 അടി ഉയരത്തില്‍ നിന്ന് അഗര്‍ത്തലയിലേക്കുള്ള ലാന്‍ഡിങ്ങിനൊരുങ്ങുകയായിരുന്നു എയര്‍ ഡെക്കാന്റെ വിമാനം.

അതേസമയം ഇന്‍ഡിഗോ ആകട്ടെ കൊല്‍ക്കത്തയില്‍ നിന്ന് ടേക്ക് ഓഫിന് ശേഷം പറന്നുയരുകയായിരുന്നു. ഇത് 8300 അടി ഉയരത്തിലെത്തിയപ്പോഴായിരുന്നു വിമാനത്തിലെ ട്രാഫിക് കൊളിഷന്‍ എവോയ്ഡന്‍സ് സിസ്റ്റം(ടി.സി.എ.എസ്) മുന്നറിയിപ്പ് നല്‍കിയത്. തുടര്‍ന്ന് ഇരുവിമാനത്തിലെയും പൈലറ്റുമാര്‍ വിമാനം സുരക്ഷിത അകലത്തിലേക്കു മാറ്റുകയായിരുന്നു. സംഭവം ഇന്‍ഡിഗോ വക്താവ് സ്ഥിരീകരിച്ചിട്ടുണ്ട്
എയര്‍ക്രാഫ്റ്റ് ആക്‌സിഡന്റ് ഇന്‍വെസ്റ്റിഗേഷന്‍ ബ്യൂറോ (എ.എ.ഐ.ബി) സംഭവത്തില്‍ അന്വേഷണം ആരംഭിച്ചിട്ടുണ്ട്. 
സാധാരണ ഗതിയില്‍ വിമാനങ്ങള്‍ യാത്ര ചെയ്യുമ്പോള്‍ പാലിക്കേണ്ട അകലം ഇക്കാര്യത്തില്‍ ഉണ്ടായില്ലെന്നാണ് പ്രാഥമിക അന്വേഷണത്തില്‍ കണ്ടെത്തിയിരിക്കുന്നത്.