ലഹരി മരുന്നിന് അടിമയായ മകന്‍ വീടിനു തീയിട്ടതോടെ വീട്ടിനുള്ളില്‍ കുടുങ്ങിപ്പോയ മാതാപിതാക്കളായ വൃദ്ധ ദമ്പതികള്‍ വെന്തുമരിച്ചു. പശ്ചിമ ഡല്‍ഹിയില്‍ വെള്ളിയാഴ്ച പുലര്‍ച്ചെയായിരുന്നു സംഭവമുണ്ടായത്. വീട്ടില്‍ വാടകയ്ക്ക് താമസിച്ചിരുന്ന ആള്‍ കാര്യമായ പൊള്ളല്‍ ഏല്‍ക്കാതെ രക്ഷപ്പെട്ടു. ഛേദി ലാല്‍ (70), ഭാര്യ ലക്ഷ്മി (63) എന്നിവരാണ് കൊല്ലപ്പെട്ടത്. ഇവരുടെ വാടകക്കാരനായ സന്തോഷ് ഗുപ്ത (40) ആണ് പരുക്കുകളോടെ രക്ഷപ്പെട്ടത്. 

ദമ്പതികളുടെ മകനാണ് വീടിനു തീയിട്ടതെന്ന് സന്തോഷ് ആണ് പോലീസിന് മൊഴി നല്‍കിയത്. സംഭവത്തിനു ശേഷം കാണാതായിരിക്കുന്ന മകനുവേണ്ടി പോലീസ് തെരച്ചില്‍ ആരംഭിച്ചു. വെള്ളിയാഴ്ച പുലര്‍ച്ചെ മൂന്നു മണിയോടെയാണ് ഇവരുടെ വീട്ടില്‍ നിന്ന് തീ ഉയരുന്നത് കണ്ടത്.

വീടിനുള്ളില്‍ കുടുങ്ങിപ്പോയ ഭാര്യയെ രക്ഷിക്കാനുള്ള ശ്രമത്തിനിടെയാണ് ഭര്‍ത്താവും മരിച്ചത്. ഇയാള്‍ കടുത്ത പ്രമേഹരോഗിയും തനിയെ നടക്കാന്‍ പോലും കഴിയാത്ത ആളുമായിരുന്നു. ഏതാനും വര്‍ഷങ്ങള്‍ക്ക് മുന്‍പാണ് ദമ്പതികള്‍ മോട്ടി നഗറിലെ സുന്ദേര്‍ശന്‍ പാര്‍ക്കില്‍ ഈ ഇരുനില വീട് വിലയ്ക്ക് വാങ്ങിയത്. വീടിന്റെ ഒരു ഭാഗം വാടകയ്ക്ക് നല്‍കിയിരുന്നു. വാടകക്കാരനായ സന്തോഷ് വീട് പൂട്ടിയാണ് കിടന്നിരുന്നത്. എന്നാല്‍ വീടിനുള്ളില്‍ നിന്ന് തീ ഉയരുന്നത് കണ്ടതോടെ മുറി തുറക്കാന്‍ ശ്രമിച്ചിരുന്നുവെങ്കിലും പുറത്തുനിന്ന് പൂട്ടിയ നിലയിലായിരുന്നു. ഈ സമയം ദമ്പതികളുടെ മകന്‍ സന്തോഷ് അവിടെ നില്‍ക്കുന്നത് കണ്ടു. അയാളെ വിളിച്ചുവെങ്കിലും ഓടി രക്ഷപ്പെടുകയായിരുന്നുവെന്നും സന്തോഷ് ഗുപ്ത പറയുന്നു. 

അഗ്‌നിശമനസേനയെ വിളിച്ചുവെങ്കിലും 15 മിനിറ്റ് വൈകിയാണ് അവര്‍ എത്തിയത്. ഇടുങ്ങിയ തെരുവില്‍ അഗ്‌നിശമന സേനയുടെ വാഹനം പാര്‍ക്ക് ചെയ്യാന്‍ കഴിയാത്തതും വിനയായി. തീ കെടുത്തിയപ്പോഴേക്കും ദമ്പതികള്‍ മരണമടഞ്ഞിരുന്നു. ദമ്പതികള്‍ക്ക് ഒമ്പത് മക്കളാണുള്ളത്. ഇവരില്‍ നാലു പേര്‍ കഴിഞ്ഞ 12 വര്‍ഷത്തിനുള്ളില്‍ മരണമടഞ്ഞു. മൂന്നുപേരുടേത് സ്വഭാവിക മരണവും ഒരാളുടേത് കൊലപാതകവുമായിരുന്നു.
മറ്റ് മക്കളില്‍ മൂന്നു ആണ്‍മക്കളും രണ്ട് പെണ്‍മക്കളുമാണുള്ളത് ഇവരില്‍ നാലു പേര്‍ സമീപത്തുതന്നെയാണ് താമസം. മാതാപിതാക്കളും ലഹരിമരുന്നിന് അടിമയായ മകനുമായിരുന്നു ഈ വീട്ടില്‍ കഴിഞ്ഞിരുന്നത്. ലഹരിമരുന്ന് വാങ്ങാന്‍ പണം ആവശ്യപ്പെട്ട് മകന്‍ പലപ്പോഴും ഇവരെ മര്‍ദ്ദിച്ചിരുന്നതായും ആരോപണമുണ്ട്.