കര്‍ണ്ണാടക രാഷ്ട്രീയത്തില്‍ തിരിച്ച് വരവ് പ്രതീക്ഷിച്ച് ജനതാദള്‍ എസ്സ്. കര്‍ണ്ണാടകയില്‍ തൂക്ക് സഭയാകും നിലവില്‍ വരിക എന്ന എക്‌സിറ്റ് പോള്‍ ഫലങ്ങളില്‍ പ്രതീക്ഷയര്‍പ്പിക്കുന്ന ഒരേയോരു രാഷ്ട്രീയ പാര്‍ട്ടി ജനതാദള്‍ എസ്സാണ്. കര്‍ണ്ണാടകയില്‍ ആര് സര്‍ക്കാര്‍ രൂപീകരിക്കുമെന്നത് ജനതാദള്‍ എസ്സിന്റെ തീരുമാനത്തിനനുസരിച്ചായിരിക്കും എന്ന എക്‌സിറ്റ് പോള്‍ ഫലങ്ങള്‍ ജനതാദളിനെ സംബന്ധിച്ചടുത്തോളം അവരുടെ വിലപേശല്‍ ശക്തി വര്‍ദ്ധിപ്പിക്കുന്നതാണ്. കര്‍ണ്ണാടകയില്‍ ബിഎസ്പി യുമായി ചേര്‍ന്ന് മത്സരിച്ച ജനതാദള്‍ എസ്സ് കര്‍ഷകരുടേയും ദളിതുകളുടേയും സ്വാധീന മേഖലകളില്‍ വലിയ പ്രചാരണമാണ് നടത്തിയത്.

പാര്‍ട്ടിയുടെ താര പ്രചാരകന്‍ മുന്‍ പ്രധാനമന്ത്രി ദേവഗൗഡ തന്നെയായിരുന്നു. എന്നാല്‍ പാര്‍ട്ടിയുടെ ഭാവി സംബന്ധിച്ച തീരുമാനങ്ങള്‍ കൈകൊള്ളുക ദേവഗൗഡയുടെ മകന്‍ കുമാരസ്വാമിയായിരിക്കും. സര്‍ക്കാര്‍ രൂപീകരണത്തിന് ജനതാദള്‍ എസ്സിനെ ഒപ്പം കൂട്ടുന്നതിനുള്ള ശ്രമം ബിജെപിയുടെ ഭാഗത്ത് നിന്ന് നടക്കുന്നതായാണ് വിവരം. കേവല ഭൂരിപക്ഷത്തിന് ജനതാദള്‍ എസി ന്റെ പിന്‍തുണ തേടുന്നതിന് ബിജെപി തയ്യാറുമാണ്. അതേസമയം സീറ്റുകളുടെ എണ്ണത്തില്‍ വലിയ മുന്നേറ്റമുണ്ടായാല്‍ മുഖ്യമന്ത്രി സ്ഥാനം ഉള്‍പ്പെടെ ആവശ്യപെട്ട് കൊണ്ട് വലിയ വിലപേശലിനാണ് ജനതാദള്‍ ആഗ്രഹിക്കുക. കുമാരസ്വാമിയും കോണ്‍ഗ്രസ്സ് നേതാവ് സിദ്ധരാമയ്യയും തമ്മിലുള്ള ശത്രുത മാറ്റിവെച്ചാല്‍ കോണ്‍ഗ്രസുമായി സഹകരിക്കുന്നതിനും ജനതാദളിന് ബുദ്ധിമുട്ടുണ്ടാകില്ല. മതേതര പാര്‍ട്ടികള്‍ ബിജെപിക്കെതിരെ ഒന്നിക്കണമെന്ന നിലപാടുള്ള കേരളത്തിലുള്‍പ്പെടെയുള്ള ജനതാദള്‍ നേതാക്കള്‍ക്കും കോണ്‍ഗ്രസുമായുള്ള സഖ്യത്തിനോടാണ് താല്പര്യം.

എന്തായാലും ബിജെപിയുമായി സഹകരിക്കാനുള്ള തീരുമാനം ജെഡി എസ്സി ന്റെ ഭാഗത്ത് നിന്നുണ്ടായാല്‍ പാര്‍ട്ടിയുടെ കേരളാ ഘടകം ദേവഗൗഡ നേതൃത്വം നല്‍കുന്ന കര്‍ണ്ണാടക ഘടകവുമായുള്ള ബന്ധമുപേക്ഷിച്ച് സ്വന്തം നിലയ്ക്ക് മുന്നോട്ട് പോവുകയും ഇടതുമുന്നണിയുടെ ഭാഗമായി തുടരാനും തീരുമാനിക്കും