ബിജെപി ദേശീയ നേതൃത്വം സംഘടിപ്പിക്കുന്ന നൈപുണ്യ വികസന പരിപാടിയിൽ പങ്കെടുക്കാനെത്തിയ കേരള സംഘത്തോട് സംവദിച്ച് പ്രധാനമന്ത്രി നരേന്ദ്ര മോദി. പ്രധാനമന്ത്രിയുടെ ആഗ്രഹം രാജ്യത്തെ മികച്ച വികസന മാതൃകകൾ തിരുവനന്തപുരത്ത് നടപ്പിലാക്കുക എന്നതാണെന്ന് മേയർ വി.വി. രാജേഷ്. മറ്റ് സംസ്ഥാനങ്ങളിലെ വികസന മാതൃകകൾ നേരിട്ട് കണ്ട് പഠിക്കാൻ ജനപ്രതിനിധികളെ അയച്ചത് പ്രധാനമന്ത്രി നേരിട്ടാണ്. അധ്യാപകനെപ്പോലെയും ജ്യേഷ്ഠ സഹോദരനെപ്പോലെയും പിതാവിനെപ്പോലെയും ലോക നേതാവിനെപ്പോലെയും പ്രധാനമന്ത്രി സംസാരിച്ചതായി മേയർ പറഞ്ഞു.

തന്റെ 25 വർഷത്തെ ഭരണപരിചയം പങ്കുവെച്ച അദ്ദേഹം രാജ്യത്തിന് പ്രഥമ പരിഗണന നൽകണമെന്ന് നിർദേശിച്ചു. അതിന് ശേഷം മാത്രമേ ജനങ്ങൾക്കും സമൂഹത്തിനും പ്രസ്ഥാനത്തിനും ശേഷം വ്യക്തിപരമായ കാര്യങ്ങൾക്ക് സ്ഥാനം നൽകാവൂ എന്നും പ്രധാനമന്ത്രി ഉപദേശിച്ചതായി അദ്ദേഹം പറഞ്ഞു

തിരുവനന്തപുരത്തിനായി കോടികളുടെ പദ്ധതികൾ ഉടൻ പ്രഖ്യാപിക്കുമെന്നത് മാധ്യമ പ്രചരണം മാത്രമാണ്. കോർപ്പറേഷന് അർഹമായത് നേടിയെടുക്കുക എന്നതാണ് ലക്ഷ്യമെന്നും മേയർ വ്യക്തമാക്കി. ഭരണത്തിന്റെ ആദ്യഘട്ടത്തിൽ അർഹരായ 2000 പേർക്ക് എത്രയും വേഗം വീട് ലഭ്യമാക്കുന്നതിനായിരിക്കും മുൻഗണന നൽകുകയെന്നും മേയർ വി.വി. രാജേഷ് വ്യക്തമാക്കി.