പുതുയുഗ യാത്രയ്ക്കിടെ പൊട്ടിത്തെറിച്ച് പ്രതിപക്ഷ നേതാവ് വി ഡി സതീശൻ. യാത്ര താനൂരിൽ എത്തിയപ്പോൾ നാടകീയമായ സംഭവങ്ങൾ അരങ്ങേറി . സ്വീകരണ വേദിയിൽ പ്രതിപക്ഷ നേതാവ് വിഡി സതീശൻ പൊട്ടിത്തെറിച്ചു.അദ്ദേഹം സംസാരിക്കാൻ നിൽക്കുന്നതിനിടയിൽ പ്രവർത്തകർ പടക്കം പൊട്ടിച്ചത് വിഡി സതീശനെ ചൊടിപ്പിക്കുകയായിരുന്നു .

മാലപ്പടക്കം നിർത്താതെ പൊട്ടിയതോടെ, താൻ സംസാരിക്കുന്നില്ലെന്നും വേറെ ആരെയെങ്കിലും വിളിക്കാനും എന്ത് തോന്നിവാസമാണ് ഈ കാണിക്കുന്നതെന്നും ദേഷ്യത്തോടെ വിഡി സതീശൻ ചോദിച്ചു. സതീശൻ ദേഷ്യപ്പെടുന്നതും ചുറ്റും നിൽക്കുന്നവരെ ശകാരിക്കുന്നതുമായ ദൃശ്യങ്ങൾ പ്രചരിക്കുകയാണ്. വേദിയിൽ സ്വാഗത പ്രാസംഗികൻ പടക്കം പൊട്ടിക്കുന്നത് നിർത്താൻ ആവർത്തിച്ച് ആവശ്യപ്പെടുന്നുണ്ടായിരുന്നു

അതേസമയം താനൂർ സ്വീകരണ സമ്മേളനങ്ങളില്‍ സര്‍ക്കാരിനെതിരെയും മുഖ്യമന്ത്രി പിണറായി വിജയനെതിരെയും രൂക്ഷമായ വിമര്‍ശനങ്ങൾ പ്രതിപക്ഷ നേതാവ് ഉയര്‍ത്തി. തിരഞ്ഞെടുപ്പില്‍ മലപ്പുറത്തെ 16 നിയമസഭാ സീറ്റുകളിലും യു.ഡി.എഫ് വിജയിക്കണമെന്നും 100 ശതമാനം കരുത്തോടെ ജില്ല മുന്നണിക്ക് ഒപ്പം നില്‍ക്കണമെന്നും അദ്ദേഹം പ്രവര്‍ത്തകരോട് ആവശ്യപ്പെട്ടു.