പ്രകോപനപരവും സ്ത്രീ വിരുദ്ധവുമായി മുദ്രാവാക്യം വിളിച്ചതിൽ സിപിഎം നേതാവ് ചിന്ത ജെറോം ഉൾപ്പെടെ 55 പേർക്കെതിരെ കേസെടുത്ത് പോലീസ്. സമൂഹത്തിൽ സ്പർധയുണ്ടാക്കി കലഹം സൃഷ്ടിക്കണമെന്ന ഉദ്ദേശ്യത്തോടെ സംഘം ചേർന്ന് ജാഥ നടത്തിയെന്ന് എഫ്ഐആറിൽ വ്യക്തമാക്കിയിട്ടുണ്ട്. കൊല്ലം ഇരവിപുരം പൊലീസ് ആണ് കേസെടുത്തത്.

ഡിവൈഎഫ്ഐ കൊല്ലം ഈസ്റ്റ് ബ്ലോക്ക് കമ്മിറ്റിയുടെ പ്രകടനത്തിലാണ് സ്ത്രീവിരുദ്ധ മുദ്രാവാക്യങ്ങളുണ്ടായത്. സംഭവം വിവാദമായതിനു പിന്നാലെ ചിന്ത വിശദീകരണവുമായി രംഗത്തെത്തി. പ്രതിഷേധപ്രകടനം നടക്കുമ്പോൾ വൈകാരികമായി മുദ്രാവാക്യം വിളിക്കുന്നത് സ്വാഭാവികമാണ്. സമൂഹമാധ്യമങ്ങളിൽ പ്രചരിക്കുന്നത് വിഡിയോയുടെ ഒരു ഭാഗം മാത്രമാണെന്ന് ചിന്ത പറഞ്ഞു.

എന്നാൽ സ്ത്രീകൾക്കും അരികുവൽക്കരിക്കപ്പെട്ടവർക്കും ഒപ്പം നിൽക്കുന്ന പുരോഗമന രാഷ്ട്രീയമാണ് സിപിഎമ്മിന്റേതെന്നും എല്ലാക്കാലത്തും സ്തീപക്ഷ നിലപാട് ഉയർത്തിപ്പിടിക്കുന്ന ആളാണ് താനെന്നും . ഇത്തരം ആരോപണങ്ങൾ വേദനിപ്പിക്കുന്നുണ്ടെന്നും ചിന്ത പറഞ്ഞു . മുദ്രാവാക്യം ഏറ്റുവിളിച്ചിട്ടില്ല, അങ്ങനെയുണ്ടായപ്പോൾ തിരുത്താനാണ് ശ്രമിച്ചതെന്നും ചിന്ത ജെറോം വ്യക്തമാക്കി.