ആരോഗ്യ മന്ത്രി വീണാ ജോർജിന് കരിങ്കൊടി പ്രതിഷേധത്തിനിടെ പരിക്കേറ്റ സംഭവത്തിൽ രൂക്ഷ പ്രതികരണവുമായി ഷാഫി പറമ്പിൽ എം.പി. ഷാഫിയുടെ വാക്കുകൾ ഇങ്ങനെ; കേരളം കഴുത്തിന് പിടിക്കും. ഇപ്പോഴല്ല, അടുത്ത തിരഞ്ഞെടുപ്പിൽ ഈ സർക്കാരിനെ ബാലറ്റിലൂടെ കേരളം കഴുത്തിന് പിടിച്ച് തന്നെ പുറത്താക്കും. ഇപ്പോ അങ്ങിനെ ഉണ്ടായിട്ടില്ല എന്ന് ആ ദൃശ്യങ്ങൾ വ്യക്തമായി പറയുന്നുണ്ട്.

ചെടിച്ചട്ടി കൊണ്ട് തലയ്ക്കടിച്ചാൽ രക്ഷാപ്രവർത്തനവും കരിങ്കൊടി കാണിച്ചാൽ വധശ്രമവുമാകുന്ന കുതന്ത്രത്തിലൊന്നും ഇനി ജനങ്ങൾ വീഴില്ല. ഇല്ലാത്ത അക്രമത്തിന്റെ പേരിൽ പതിവ് ഗുണ്ടാപണിയുമായി ഇറങ്ങിയിരിക്കുന്ന ക്രിമിനലുകളുടെ പേരിൽ മന്ത്രിക്കും അരിവാൾ കത്രിക നക്ഷത്ര വകുപ്പിനുമെതിരായ സമരത്തിന് അറുതിയാകുമെന്ന് ആരും കരുതേണ്ട.

മുൻപ് തനിക്ക് മർദനമേറ്റപ്പോൾ പരിഹസിച്ചവർ ഇപ്പോൾ മന്ത്രിയുടെ കാര്യത്തിൽ വികാരഭരിതരാകുന്നത് ഇരട്ടത്താപ്പാണെന്ന് അദ്ദേഹം കുറ്റപ്പെടുത്തി. മൂക്കിന് മർദനമേറ്റാൽ വീൽചെയറിൽ പോകണമോ, നടന്നുപോയാൽ ഐ.സി.യുവിൽ കയറ്റുമോ എന്നെല്ലാം ചോദിച്ചവർ ഇപ്പോൾ എവിടെയാണെന്ന് ഷാഫി . പേരാമ്പ്രയിൽ തനിക്ക് പരിക്കേറ്റപ്പോൾ പരിഹസിച്ചവർ ഇപ്പോൾ മന്ത്രിക്കൊപ്പമാണെന്നും അദ്ദേഹം പറഞ്ഞു.

റെയിൽവേ സ്റ്റേഷനിലെ പ്രതിഷേധ ദൃശ്യങ്ങൾ പരിശോധിച്ചിട്ടും മന്ത്രിയെ ആക്രമിക്കുന്നത് കാണാൻ കഴിഞ്ഞിട്ടില്ല. കഴുത്തും കയ്യും പിടിച്ച് തിരിച്ചു എന്നൊക്കെയുള്ള സി.പി.ഐ.എം സംസ്ഥാന സെക്രട്ടറിയുടെ പ്രസ്താവനകൾ അണികളെ ഇളക്കിവിടാനാണെന്നും അദ്ദേഹം ആരോപിച്ചു.