അബുദാബിയിലെ വിമാനത്താവളത്തിൽ നിന്നും പുറപ്പെടേണ്ട വിമാനത്തിനുണ്ടായ സാങ്കേതിക തകരാർ മൂലം കുടുങ്ങിക്കിടന്നത് 185 യാത്രക്കാരാണ്. ഇന്നലെ അബുദാബിയിൽ നിന്നും കോഴിക്കോട്ടേയ്ക്ക് പുറപ്പെടേണ്ടിയിരുന്ന എയർ ഇന്ത്യ എക്സ്പ്രസ് ഐ.എക്സ് 348 എന്ന വിമാനമാണ് സാങ്കേതിക തകരാർ മൂലം റദ്ദാക്കുകയാണെന്ന് അറിയിച്ചത്.

ഇന്നലെ രാത്രി 12.20ന് പുറപ്പെടേണ്ടിയിരുന്നതായിരുന്നു വിമാനം എന്നാൽ 14 മണിക്കൂറുകൾ കഴിഞ്ഞിട്ടും വിമാനം പുറപ്പെടുകയുണ്ടായില്ല. തുടർന്ന് ഇന്ന് വൈകിട്ട് രണ്ടു മണിയോടെയാണ് എയർ ഇന്ത്യ എക്സ്പ്രസ് യാത്രപുറപ്പെട്ടത്.

ബോഡിങ് പാസ്സ് നൽകിയ ശേഷം വിമാനം പുറപ്പെടാൻ മിനിറ്റുകൾ മാത്രം ബാക്കിയുള്ളപ്പോഴായിരുന്നു സാങ്കേതിക തകരാറിന്റെ പേരിൽ യാത്ര റദ്ദാക്കിയത്. യാത്രക്കാരെ രാത്രിയിൽ വിമാനത്താവളത്തിനു സമീപത്തെ ഹോട്ടലിൽ താമസിപ്പിച്ചു. എന്നാൽ രാവിലെ എട്ടരയോടെ പുറപ്പെടും എന്നു പറഞ്ഞ് യാത്രക്കാരെ ഏഴുമണിയോടെ വിമാനത്താവളത്തിൽ വീണ്ടും എത്തിച്ചെങ്കിലും യാത്ര പുറപ്പെടാൻ സാധിച്ചില്ല. വൻ തുക ടിക്കറ്റിനു നൽകിയ യാത്രക്കാർക്കാണ് ഈ ദുർഗതി നേരിടേണ്ടി വന്നത്.