പ്രവാസികള്ക്ക് ആശ്വാസമായി ; ജൂണ് 15 മുതല് സെപ്റ്റംബര് വരെ നീളുന്ന നാലു ഘട്ടങ്ങളിലായി രാജ്യത്തെ കോവിഡ് നീയന്ത്രണങ്ങളെല്ലാം ഖത്തര് നീക്കുന്നു
ജൂണ് 15 മുതല് സെപ്റ്റംബര് വരെ നീളുന്ന നാലു ഘട്ടങ്ങളിലായി രാജ്യത്തെ കോവിഡ് നീയന്ത്രണങ്ങളെല്ലാം ഖത്തര് നീക്കുന്നു. ആഗസ്റ്റില് ആരംഭിക്കുന്ന മൂന്നാംഘട്ടത്തില് പ്രവാസികള്ക്ക് രാജ്യത്തേക്ക് തിരിച്ചെത്താന് അനുമതി നല്കും. കോവിഡ് വ്യാപനം കുറഞ്ഞ രാജ്യങ്ങളില് നിന്നുള്ളവര്ക്കാണ് ആഗസ്റ്റ് ഒന്നു മുതല് പ്രവേശനം അനുവദിക്കുക. എന്നാല് മടങ്ങിയെത്തുന്ന പ്രവാസികള് സ്വന്തം ചെലവില് 14 ദിവസത്തെ ഹോട്ടല് ക്വാറന്റീനില് കഴിയണം. ദേശീയ ദുരന്തനിവാരണ പരമോന്നതസമിതി വക്താവ് ലുല്വ അല് ഖാദിര് ആണ് വാര്ത്താസമ്മേളനത്തില് ഇതുസംബന്ധിച്ച വിശദാംശങ്ങള് നല്കിയത്.
രാജ്യം അനിശ്ചിതമായി അടച്ചിടാന് കഴിയാത്തതിനാലാണ് ഘട്ടംഘട്ടമായി നിയന്ത്രണങ്ങള് നീക്കുന്നതെന്നു വിശദീകരിച്ച ലുല്വ അല് ഖാദിര് ജൂണ് 15ന് ആരംഭിക്കുന്ന ഒന്നാംഘട്ടത്തില് രാജ്യത്തെ സ്വകാര്യ ആരോഗ്യകേന്ദ്രങ്ങള്ക്ക് 40% പ്രവര്ത്തനാനുമതി നല്കുമെന്നും അറിയിച്ചു. രാജ്യത്തെ പള്ളികള് ജൂണ് 15 മുതല് നിയന്ത്രണവിധേയമായി തുറക്കുമെന്ന് ഔഖാഫ്, ഇസ്ലാമികകാര്യ മന്ത്രാലയവും അറിയിച്ചു. ജൂലൈ ഒന്നിന് ആരംഭിക്കുന്ന രണ്ടാംഘട്ടത്തില് 50% ജീവനക്കാരുമായി ഓഫിസുകള് പ്രവര്ത്തിക്കും. മാര്ക്കറ്റുകളും മൊത്തവില്പനകേന്ദ്രങ്ങളും നിയന്ത്രണവിധേയമായി നിശ്ചിത മണിക്കൂറുകള് പ്രവര്ത്തിച്ചു തുടങ്ങും.
ലൈബ്രറികള്, മ്യൂസിയങ്ങള് എന്നിവയും നിശ്ചിതഎണ്ണം ആളുകള്ക്ക് പ്രവേശനം അനുവദിക്കും. ആഗസ്റ്റ് 1ന് ആരംഭിക്കുന്ന മൂന്നാംഘട്ടത്തില് ദോഹയിലേക്ക് മറ്റു രാജ്യങ്ങളില് നിന്നു വിമാനങ്ങള് അനുവദിക്കും. വാണിജ്യകേന്ദ്രങ്ങളുടെ പ്രവര്ത്തനം പൂര്ണതോതില് ആകും. മാര്ക്കറ്റുകളിലും മൊത്തവില്പനകേന്ദ്രങ്ങളിലും നിയന്ത്രണവിധേയമായി പ്രവേശനം തുടരും. ഡ്രൈവിങ് സ്കൂളുകള്, നഴ്സറികള്, ശിശുപരിപാലന കേന്ദ്രങ്ങള് എന്നിവ തുറക്കാനും മൂന്നാംഘട്ടത്തില് അനുമതി നല്കും. ഓഫിസുകളിലെ ഹാജര്നില 80% ആക്കി ഉയര്ത്തുകയും ചെയ്യും. സെപ്റ്റംബര് ഒന്നിനാരംഭിക്കുന്ന നാലാംഘട്ടത്തില് സ്കൂളുകള് തുറന്നു പ്രവര്ത്തിക്കും. മ്യൂസിയങ്ങള്, ലൈബ്രറികള്, എല്ലാത്തരം വാണിജ്യകേന്ദ്രങ്ങള്, ഹോട്ടലുകള്, റസ്റ്ററന്റുകള് എന്നിവയുടെ പ്രവര്ത്തനം പൂര്ണതോതില് പുനരാരംഭിക്കും. പരമാവധി വിമനസര്വീസുകള്ക്കും സെപ്റ്റംബറില് അനുമതി ലഭിക്കും.
https://www.facebook.com/Malayalivartha
