കെ എസ് ചിത്രയുടെ മിഴി നിറഞ്ഞു, മനം ഉരുകി എന്ന ഹിറ്റ് ഗാനം ആറു വയസുകാരി നൈഗ പാടുന്നത് സോഷ്യല്‍ മീഡിയ ഏറ്റെടുത്തിട്ട് കുറച്ചു ദിവസങ്ങളായി. തന്റെ കുഞ്ഞുജത്തിക്കുവേണ്ടിയാണ് ഇവള്‍ മനമുരുകി പാടുന്നത്. അക്കഥ ഇങ്ങനെ.

കണ്ണൂര്‍ ജില്ലയിലെ ചെറുപുഴ കടുമേനി സ്വദേശികളായ സനു സിദ്ധാര്‍ത്ഥ് -ഷോഗ ദമ്പതികളുടെ ഇരട്ടക്കുട്ടികളാണ് നൈഗയും വൈഗയും. കുട്ടികള്‍ ജനിച്ച് ഒന്നരവര്‍ഷമായപ്പോഴേക്കും ഇവര്‍ ന്യൂസിലന്റിലേക്ക് താമസം മാറി. ഇരട്ടക്കുട്ടികള്‍ അങ്ങനെ വളര്‍ന്നു. എന്നാല്‍ സന്തോഷത്തിന്റെ നാളുകളില്‍ വൈഗയ്ക്ക് പനിപിടിച്ചു. അത് പിന്നീട് ന്യൂമോണിയയായി മാറി.

ന്യൂമോണിയ തലച്ചോറിനെ ബാധിച്ചതോടെ തളര്‍ന്നുപോയി കുഞ്ഞു വൈഗ. കുഞ്ഞിന്റെ ഒരു ഭാഗം തളര്‍ന്നു. വൈഗ മോളുടെ ബ്രെയിന്‍ സെല്ലുകള്‍ മരിച്ചു തുടങ്ങി ഇനി പ്രതീക്ഷ വേണ്ടാന്നു വരെ ഡോക്ടര്‍മാര്‍ വിധിയെഴുതി. ജീവിതത്തിലേക്ക് തിരിച്ചുവരും എന്ന് യാതൊരു ഉറപ്പും ഇല്ലെന്നു ഡോക്ടര്‍മാര്‍ മൂന്ന് തവണ പറഞ്ഞു.

രണ്ടാഴ്ചയിലേറെക്കാലം വൈഗ വെന്റിലേറ്ററില്‍ കിടന്നു. ബ്രെയിന്‍ ഡെത്ത് എന്ന അവസ്ഥ എന്നാല്‍ പിന്നെ ഒരു പ്രതീക്ഷയും വേണ്ടാ എന്നാണ്. പക്ഷെ, ദൈവത്തിന്റെ ശക്തമായ കരങ്ങള്‍ വൈഗ മോളെ ജീവിതത്തിലേക്കു തിരിച്ചുകൊണ്ടുവന്നു. ഓപ്പണ്‍ സ്‌കള്‍ സര്‍ജറിയിലൂടെ വൈഗയുടെ ജീവന്‍ തിരിച്ചു ലഭിച്ചു. വൈഗ മോളുടെ സര്‍ജറിയില്‍ അവളുടെ മുടി മുറിച്ചപ്പോള്‍ തന്റെ മുടിയും മുറിച്ചു ക്യാന്‍സര്‍ രോഗികള്‍ക്കായി നല്‍കി കുഞ്ഞു നൈഗ.

പിന്നീട് കുഞ്ഞു വൈഗയെ പഴയ ഓര്‍മകളിലേക്ക് തിരിച്ചു കൊണ്ടുവരാന്‍ അവളുടെ ഒപ്പം ഉണ്ടായിരുന്നു. വെറും ആറര വയസ്സില്‍ തന്റെ കൂടപ്പിറപ്പിനുവേണ്ടി പ്രാര്‍ത്ഥനയോടെ എന്നും ഒപ്പമുണ്ടായിരുന്നു നൈഗ മോള്‍. എത്രയെത്ര മാസങ്ങള്‍ ഹോസ്പിറ്റലും റീഹാബിലിറ്റേഷന്‍ സെന്ററിലും ആയി അവര്‍ കഴിച്ചുക്കൂട്ടി. അദ്ഭുതശിശു എന്നാണ് ഡോക്ടര്‍മാര്‍ വൈഗ മോളെ വിളിക്കുന്നത്. ആ കുഞ്ഞുശരീരം ഏറ്റുവാങ്ങിയ വേദനകളും ഈ സമയങ്ങളില്‍ കുടുംബം അനുഭവിച്ച വേദനയും വലുതാണ്. ദൈവാനുഗ്രഹത്താല്‍ കുഞ്ഞു വൈഗ സുഖമായി വരുന്നു.

അവരുടെ ജീവിതത്തില്‍ ഉണ്ടായ ഈ വലിയ അനുഭവങ്ങളിലെ കുറച്ചു ഭാഗങ്ങളും 'മിഴി നിറഞ്ഞു മനം മുറിഞ്ഞു...' എന്ന ചിത്ര ചേച്ചി ആലപിച്ച ഗാനവും ഉള്‍പ്പെടുത്തി വിഡിയോ ആല്‍ബം ചെയ്തിരുന്നു. നൈഗമോളാണ് അനുജത്തിക്കുവേണ്ടി മനമുരുകി പാടിയിരിക്കുന്നത്.