സന്തോഷത്തിന്റെ ധൂര്ത്ത് മാത്രം..! വെറും 20,000 രൂപ ചെലവില് ഒരു 'ആഡംബര' വിവാഹം
ട്വിറ്ററില് ചര്ച്ചയാകുകയാണ് റിസ്വാന് എന്ന പാക്കിസ്ഥാനി യുവാവിന്റെ പോസ്റ്റ്. വെറും 20000 രൂപയ്ക്ക് ഒരു ആഘോഷ വിവാഹം. ആര്ക്കും ചിന്തിക്കാന് കൂടി കഴിയില്ലായിരിക്കാം. എന്നാല് തന്റെ വിവാഹം സംബന്ധിച്ച് റിസ്വാന് പെഹല്വാന് ട്വീറ്റ് ചെയ്തതിലൂടെയാണ് എല്ലാവരും വിവരം അറിഞ്ഞത്.
വിവാഹത്തിന് ആളുകളെ ക്ഷണിച്ചതുമുതല് വേദി ഒരുക്കിയതു വരെ ലളിതമായി റിസ്വാന് ട്വിറ്ററില് വിവരിച്ചിരിക്കുന്നു. റിസ്വാന്റെ ട്വീറ്റ് ഇങ്ങനെ: വീടിന്റെ ടെറസില് ഒരുക്കിയ വിവാഹ വേദിയിലേക്ക് അടുത്ത ബന്ധുക്കളും സുഹൃത്തുക്കളുമായ 25 പേരെ ക്ഷണിച്ചു. ചിക്കന് ടിക്ക, സീക്ക് കബാബ്, പത്തൂരി ചന്ന ഹല്വ, സ്ട്രോബറികള് എന്നിവയായിരുന്നു വിഭവങ്ങള്. 20,000 രൂപ (ഇന്ത്യന് രൂപ ഏകദേശം 10000) യായിരുന്നു ബജറ്റ്. ഭക്ഷണം പാകം ചെയ്യാനുള്ള പാചകക്കാരെ സുഹൃത്തുക്കള് വിട്ടുനല്കി. നവവധു ഖട്ടായ് ആലു പാകം ചെയ്തു.
ടെറസ് അലങ്കരിക്കുന്നതിനുള്ള ബള്ബും ലൈറ്റുകളും അച്ഛന് വാങ്ങി. അതിഥികള്ക്ക് ഇരിക്കാനുള്ള കസേരകള് സമീപത്തെ തെരഞ്ഞെടുപ്പ് കമ്മിറ്റി ഓഫീസില്നിന്ന് എടുത്തു. മേശകള് സുഹൃത്ത് കൊണ്ടുവന്നു. വരനും വധുവും നീല സല്വാര് കമീസാണു ധരിച്ചത്. അമ്മയുടെയും സഹോദരിയുടെയും സമ്മാനമായിരുന്നു ഇത്. ഇതിനുശേഷം വിവാഹ ചടങ്ങുകള് നടന്നു, റിസ്വാന് ഇങ്ങനെ ട്വീറ്റ് ചെയ്തു.
കൈയിലൊതുങ്ങുന്ന തരത്തില് എന്തുവേണമെങ്കിലും ചെയ്യാമെന്നും സന്തോഷമാണ് എല്ലാറ്റിലും ഉപരിയെന്നും റിസ്വാന് പറയുന്നു. വിവാഹചടങ്ങിന്റെ ചിത്രങ്ങളും റിസ്വാന് ട്വിറ്ററില് പങ്കുവച്ചിട്ടുണ്ട്. റിസ്വാനും വധുവിനും ആശംസയുമായി നിരവധിപേര് ട്വിറ്ററില് രംഗത്തെത്തി.
https://www.facebook.com/Malayalivartha
