ഇപ്പോള്‍ ഏവര്‍ക്കും വളരെ പരിചിതമായൊരു പസ്സിലാണ് റുബിക്‌സ് ക്യൂബ്. പല നിറങ്ങളിലുള്ള ചെറിയ ചതുരക്കട്ടകള്‍ നിറഞ്ഞ പ്ലാസ്റ്റിക്ക് കട്ട, ഒരോ ചെറുകട്ടകളും കറക്കിയും തിരിച്ചും ക്യൂബിന്റെ ഓരോ വശവും ഒരേ നിറത്തിലാക്കണം. തലച്ചോറിനും മനസിനുമുള്ള നല്ലൊന്നാന്തരം വ്യായാമമാണ് ഈ പസ്സില്‍ ഗെയിം. എന്നാല്‍ ക്യൂബിന്റെ എല്ലാ വശവും ഒരേ നിറത്തിലാക്കുക എന്നത് അല്പം ശ്രമകരം തന്നെയാണ്. നിരന്തരമായ പരിശീലനത്തിലൂടെ ഇത് പഠിച്ചെടുക്കാവുന്നതുമാണ്. മുതിര്‍ന്നവര്‍ക്കു പോലും ഇത് ചെയ്യാന്‍ ബുദ്ധിമുട്ടാണ്.

ഇവിടെയാണ് നിയ എന്ന മൂന്ന് വയസ്സുകാരിയുടെ കഴിവ് ശ്രദ്ധേയമാകുന്നത്. അക്ഷരം പഠിച്ചുതുടങ്ങേണ്ടേ പ്രായത്തില്‍ റുബിക്‌സ് ക്യൂബില്‍ അത്ഭുതം വിരിയിക്കുന്നു നിയ എന്ന കൊച്ചുമിടുക്കി. അക്ഷമാലകളൊന്നും നിയയ്ക്ക് അത്ര പിടിയില്ല. പക്ഷേ റുബിക്‌സ് ക്യൂബ് കൈയ്യില്‍ കിട്ടിയാല്‍ മിനിറ്റുകള്‍ക്കുള്ളില്‍ സോള്‍വ് ചെയ്തിരിക്കും കക്ഷി. ആലപ്പുഴ സ്വദേശികളായ ഹാര്‍ഡ്വെയര്‍ എന്‍ജിനിയര്‍ സന്‍ജിത്തിന്റേയും വെറ്റിനറി ഡോക്ടറായ ടിക്‌സിയുടെയും മകളാണ് നിയ.

വീടിനടുത്തുള്ള മുതിര്‍ന്ന കുട്ടികള്‍ ചെയ്യുന്നത് കണ്ടാണ് നിയക്കുട്ടി ഈ പസ്സില്‍ പഠിക്കുന്നത്. ഒന്നേകാല്‍ വയസില്‍ റുബിക്‌സ് ക്യൂബുമായി ചങ്ങാത്തം കൂടിയതാണ് നിയ. നിമിഷ നേരംകൊണ്ടാണ് അവള്‍ ഇത് ചെയ്യുന്നത്. മകളുടെ നിരീക്ഷണ പാടവവും ഈ കളിയോടുള്ള താല്പര്യവും കണ്ട് പലതരത്തിലുള്ള റുബിക്‌സ് ക്യൂബുകള്‍ മാതാപിതാക്കള്‍ അവള്‍ക്ക് വാങ്ങിനല്‍കി. 1ഃ2ഃ3, ക്രിസ്മസ് ട്രീക്യൂബ്, 2ഃ2 റുബിസ്‌ക് ക്യൂബ്, പിരമിന്‍ക്‌സ് ക്യൂബ് ഒക്കെ ഈ കൊച്ചുമിടുക്കിക്ക് നിസാരമാണ്. കുഞ്ഞുകൈകളില്‍ ക്യൂബ് പിടിച്ച് വളരെ ശ്രദ്ധയോടെ പസ്സില്‍ സോള്‍വ് ചെയ്യുന്ന നിയ ഒരത്ഭുതമാവുകയാണ്.

ഇതു കൂടാതെ മറ്റൊരു വലിയ ഇഷ്ടം കൂടെയുണ്ട് ഈ കൊച്ചുമിടുക്കിക്ക്. ബോര്‍ഡ് ഗെയിമുകളുടെ കൂട്ടുകാരി കൂടിയാണ് നിയ. ഇരുന്നൂറിന് മേല്‍ ബോര്‍ഡ് ഗെയിമുകള്‍ കളിക്കാനറിയാം ഈ മിടുക്കിക്ക്. ഒരുവയസ്സില്‍ കോണിയും പാമ്പും കളിയിലൂടെ തുടങ്ങിയ ഇഷ്ടമാണ് ഇന്ന് ഇത്രയും ഗെയിമുകളില്‍ എത്തി നില്‍ക്കുന്നത്. നിയയുടെ മുറി നിറയെ ബോര്‍ഡ് ഗെയിമുകളും പസ്സിലുകളും റുബിസ്‌ക് ക്യൂബുകളുമാണ്.

മകളുടെ ഇഷ്ടമറിഞ്ഞ് പ്രോത്സാഹനവുമായി മാതാപിതാക്കള്‍ കൂടെയുണ്ട്. അതൊന്നും പോരാതെ പാട്ടിലും കരാട്ടേയിലും ഒരു കൈ നോക്കുന്നുണ്ട് നിയക്കുട്ടി. യുക്കലേലി എന്ന സംഗീത ഉപകരണവും അഭ്യസിക്കുന്നുണ്ട് നിയ ഇപ്പോള്‍.