കടലോര ഗ്രാമം കടലിലാണ്ടു പോകാതിരിക്കാന്‍ എന്ന സന്ദേശം ഉയര്‍ത്തി, സേവ് ആലപ്പാട്, സ്‌റ്റോപ് മൈനിങ് എന്ന മുദ്രാവാക്യം മുഴക്കിക്കൊണ്ട് കരിമണല്‍ വിരുദ്ധ ജനകീയ സമര സമിതി നടത്തുന്ന അനിശ്ചിതകാല നിരാഹാര സമരത്തിന് ഐക്യദാര്‍ഢ്യം പ്രഖ്യാപിച്ച്, സാഹസിക നീന്തല്‍ താരം ഡോള്‍ഫിന്‍ രതീഷ് കൈകാലുകള്‍ ബന്ധിച്ച് ടിഎസ്.കനാലില്‍ 10 കിലോ മീറ്ററിലധികം ദൂരം നീന്തി.

നിലനില്‍പ്പിനും നീതിക്കും വേണ്ടി ഒരു നാട് നടത്തുന്ന ഐതിഹാസിക സമരത്തിന് പിന്നില്‍ അണിചേരുകയാണ് സോഷ്യല്‍ ലോകം. ഇതിന് പൂര്‍ണ പിന്തുണ പ്രഖ്യാപിച്ചാണ് രതീഷ് നീന്തിയത്. പണിക്കര്‍ കടവ് പാലത്തില്‍നിന്ന് ആരംഭിച്ച നീന്തല്‍ പ്രകടനം നാലു മണിക്കൂര്‍കൊണ്ട് ആയിരം തെങ്ങ് പാലത്തിനു സമീപം പൂര്‍ത്തിയായപ്പോള്‍ പുതിയ നേട്ടം കൈവരിച്ചിരിക്കുകയാണ് രതീഷ്.

ഗിന്നസ് ബുക്ക് ഉള്‍പ്പെടെ ഏഴോളം ലോക റെക്കോര്‍ഡുകളുടെ പ്രതിനിധികള്‍ സാഹസിക നീന്തല്‍ പ്രകടനം ഷൂട്ട് ചെയ്യാന്‍ എത്തിയിരുന്നു. ടിഎസ് കനാലില്‍ ജലഘോഷയാത്രയും അഴീക്കലില്‍ സമാപന യോഗവും നടത്തി. സി.ആര്‍.മഹേഷ്, രതീഷിന്റെ കൈകാലുകള്‍ ബന്ധിച്ച് പ്രകടനം ഉദ്ഘാടനം ചെയ്തു. നടനും തിരക്കഥാകൃത്തുമായ മുരളി ഗോപി പങ്കെടുത്തു

ഒരു പഞ്ചായത്ത് തന്നെ നാശത്തിന്റെ വക്കിലെത്തിയിട്ടും യാതൊരു നടപടിയും സ്വീകരിക്കാത്ത അധികൃതര്‍ക്കെതിരെ ആലപ്പാടന്‍ ജനത നടത്തുന്ന സമരം മാസങ്ങള്‍ പിന്നിടുകയാണ്. വര്‍ഷങ്ങളായി ഐആര്‍ഇ നടത്തുന്ന കരിമണല്‍ ഖനനം വെള്ളാനാതുരുത്ത് എന്ന നാടിനെ തന്നെ കടലെടുക്കുന്ന അവസ്ഥയിലെത്തിച്ചിരിക്കുകയാണ്. ഇവര്‍ക്ക് പൂര്‍ണ പിന്തുണ പ്രഖ്യാപിച്ച് ട്രോള്‍ ക്വയ്‌ലോണ്‍ എന്ന പേജില്‍ ട്രോള്‍ ക്യാംപെയിനും തുടരുകയാണ്.