കീരിയെ പേടിച്ച് റബര്‍ മരത്തില്‍ കയറിയ മൂര്‍ഖനെ വനം വകുപ്പ് ഉദ്യോഗസ്ഥരെത്തി പിടികൂടി
കോട്ടയം കറുകച്ചാലില്‍ ഒരു മൂര്‍ഖന്‍ കീരിയുടെ ആക്രമണത്തില്‍ നിന്നു രക്ഷപ്പെട്ട് മരത്തില്‍ അഭയം പ്രാപിച്ചു.
ഇടയിരിക്കപ്പുഴ-കാനം റോഡരികില്‍ സാമൂഹിക ആരോഗ്യ കേന്ദ്രത്തിനു സമീപം ഇന്നലെ രാവിലെ 8-നാണ് സ്വകാര്യ വ്യക്തിയുടെ റബര്‍ തോട്ടത്തില്‍ കീരിയും മൂര്‍ഖനും തമ്മില്‍ ഏറ്റുമുട്ടിയത്. കാണാന്‍ നാട്ടുകാര്‍ എത്തിയതോടെ കീരി ഓടി രക്ഷപ്പെടുകയും മൂര്‍ഖന്‍ റോഡരികിലെ റബര്‍ മരത്തിനു മുകളില്‍ അഭയം പ്രാപിക്കുകയും ചെയ്തു.
നാട്ടുകാര്‍ക്ക് നേരെ മൂര്‍ഖന്‍ പത്തി വിടര്‍ത്തിയതോടെ ഇവര്‍ പഞ്ചായത്ത് അംഗം ഫൈസല്‍ വടക്കേക്കരയെ അറിയിച്ചു. പഞ്ചായത്തംഗം വിളിച്ചറിയിച്ചതനുസരിച്ച് പ്ലാച്ചേരി വനം വകുപ്പ് ഓഫിസില്‍ നിന്നും ഉദ്യോഗസ്ഥരെത്തി.
ഡപ്യൂട്ടി റേഞ്ച് ഓഫിസര്‍ പി.വി.വെജി, ബിഎഫ്ഒമാരായ അനന്ത സൂര്യ, സാം, ഷഹനാസ് സുബൈര്‍, റസ്‌ക്യു വാച്ചര്‍ അജേഷ് എന്നിവരടങ്ങുന്ന സംഘമാണ് സ്ഥലത്തെത്തിയത് . വാച്ചര്‍ അജേഷ് 10 മിനിറ്റിനുള്ളില്‍ മൂര്‍ഖനെ പിടികൂടി ചാക്കിലാക്കി. പിടികൂടിയ മൂര്‍ഖനെ പ്ലാച്ചേരി വനത്തില്‍ തുറന്നു വിടാന്‍ വനം വകുപ്പ് ഉദ്യോഗസ്ഥര്‍ കൊണ്ടുപോയി.
https://www.facebook.com/Malayalivartha
