വയനാട് എഎസ്പിയായിരിക്കെ സിവില്‍ സര്‍വീസ് പരീക്ഷയില്‍ റാങ്ക് നേട്ടവുമായി നിധിന്‍ രാജ്
കഴിഞ്ഞ സിവില്‍ സര്‍വീസ് പരീക്ഷയില്‍ 210-ാം റാങ്ക് നേടി നിലവില്‍ കേരള കേഡറില്‍ വയനാട് എഎസ്പിയായി അണ്ടര്‍ ട്രെയിനിങ്ങിലായ നിധിന്‍ രാജിന് സിവില്‍ സര്‍വീസ് പരീക്ഷയില്‍ വീണ്ടും റാങ്ക് നേട്ടം. രാവണീശ്വരം എക്കാലിലെ കെ.രാജേന്ദ്രന്റെയും പി.ലതയുടെ മകനാണ് നിധിന്‍ രാജ്.
കേഡര്‍ അലോക്കേഷന്‍ വരാന്‍ വൈകിയത് കൊണ്ടാണ് വീണ്ടും പരീക്ഷയെഴുതിയത്. എന്നാല്‍ പിന്നീട് ആഗ്രഹിച്ച കേരള കേഡര്‍ തന്നെ കിട്ടി. ഇതില്‍ ഏറെ സന്തോഷവാനാണെന്നും നിധിന്‍ പറഞ്ഞു.
ഹൈദരാബാദിലെ പരിശീലനം പൂര്‍ത്തിയാക്കിയാണ് നിധിന്‍ വയനാട് എഎസ്പി അണ്ടര്‍ ട്രെയിനിയായത്. സര്‍വീസിലിരിക്കെ വീണ്ടും റാങ്ക് നേടിയത് ജില്ലയ്ക്ക് അഭിമാനമായി. ഇത്തവണ അത് 319-ാം റാങ്കാണെങ്കിലും നേട്ടത്തിന് തിളക്കമേറെയാണ്.
പത്താം ക്ലാസ് വരെ രാവണീശ്വരം ഗവ.ഹയര്‍സെക്കന്‍ഡറി സ്‌കൂളിലാണ് പഠിച്ചത്. ഹയര്‍സെക്കന്‍ഡറി പഠനം കാഞ്ഞങ്ങാട് ദുര്‍ഗാ ഹയര്‍സെക്കന്‍ഡറി സ്‌കൂളിലായിരുന്നു. കോട്ടയം ഗവ.എന്‍ജിനീയറിങ് കോളജിലായിരുന്നു ഉന്നത പഠനം. പി.അശ്വതി സഹോദരിയാണ്.
https://www.facebook.com/Malayalivartha
