സെബിയ മറക്കില്ല കണ്ണൂര് എക്സ്പ്രസിലെ ആ യാത്ര!
പിറവത്തിനടുത്ത് ആരക്കുന്നത്തെ സെബിയയുടെ ജീവിതവും കാഴ്ചപ്പാടും മാറ്റിമറിച്ചത് കണ്ണൂര് എക്സ്പ്രസിലെ ഒരു യാത്രയായിരുന്നു. സെക്കന്ഡ് ക്ലാസ് കംപാര്ട്മെന്റിലെ ആ യാത്രയ്ക്കിടെ എതിരെ ഇരുന്ന യാത്രക്കാരന് ചോദിച്ചു, എന്താ മുഖത്തൊരു വിഷമം ? വലിയ ആലോചനയിലാണല്ലോ '!
അത് ചോദിച്ചത് ടെലിവിഷനില് മാത്രം കണ്ടിട്ടുള്ള വലിയ നേതാവാണെന്ന് തിരിച്ചറിഞ്ഞു. അതുകൊണ്ടു തന്നെ ഉമ്മന്ചാണ്ടി എന്ന രാഷ്ട്രീയക്കാരന്റെ ചോദ്യങ്ങള് ഭംഗിവാക്ക് എന്നേ സെബിയ കരുതിയുള്ളൂ. എങ്കിലും സങ്കടങ്ങള് തുറന്നു പറഞ്ഞു. പിറവത്തിനടുത്ത് ആരക്കുന്നത്താണു വീട്. കൂലിപ്പണിക്കാരനായ ഭര്ത്താവു വീടു പണി തുടങ്ങിയപ്പോള് ഹൃദയാഘാതം വന്നു മരിച്ചു. അടച്ചുറപ്പില്ലാത്ത വീട്ടില് മകളെ താമസിപ്പിക്കാന് പേടി. അവളെ നിലമ്പൂരില് അറബിക് കോളജില് ചേര്ത്തു. മകളെ കാണാന് പോകുന്ന വഴിയാണ്.
അന്ന് സംസാരിച്ചു പിരിഞ്ഞതിനു ശേഷം സെബിയ അതേക്കുറിച്ച് ഓര്ത്തതേയില്ല. എന്നാല് ഒരാഴ്ചയ്ക്കുള്ളില് പിറവം മുനിസിപ്പല് ചെയര്മാന് സാബു ജേക്കബ് വീടു തിരക്കിയെത്തിയപ്പോഴാണ് സെബിയയ്ക്ക് ആ ആശ്വാസവാക്കുകള് പൊള്ളയല്ലെന്നു മനസ്സിലായത്.
സെബിയക്കിന്ന് സ്വന്തം വീടുണ്ട്. പാലുകാച്ചലിന് മുഖ്യാതിഥിയായി ഉമ്മന്ചാണ്ടിയെത്തി. എല്ലാ രാഷ്ട്രീയക്കാരും ഒരുപോലെയല്ലെന്ന പുതിയ തിരിച്ചറിവോടെ സെബിയ അടച്ചുറപ്പുള്ള വീട്ടില് ഇന്ന് സമാധാനത്തോടെ കഴിയുന്നു.
https://www.facebook.com/Malayalivartha