പോളിയോയ്ക്ക് തളര്ത്താനായില്ല ആ മനക്കരുത്ത്, തോമസ് പോളിയോയെ തോല്പ്പിച്ച് ഡോക്ടറായി...ഇന്ന് രാജ്യാന്തര പോളിയോ ദിനം
വടവാതൂര് ഇഎസ്ഐ ആശുപത്രിയിലെ ഫിസിഷ്യന് ഡോ.ടി.സി.തോമസ് സ്വന്തമായി കാര് ഓടിച്ചു ആശുപത്രി മുറ്റത്തു വന്നിറങ്ങുമ്പോള് ആദ്യമായി കാണുന്നവര് ഒന്ന് നോക്കിനില്ക്കും. കാരണം പോളിയോ രോഗം തളര്ത്തിയ കാലുകളൂമായാണ് ഡോക്ടര് കാറോടിച്ചെത്തുന്നത്. അങ്ങനെ തന്നെ നോക്കി അത്ഭുതപ്പെടുന്നവരോട് ഡോക്ടര്ക്ക് പറയാനൊന്നേയുള്ളൂ- 'രോഗബാധിതനെങ്കില് തളര്ന്നിരിക്കാതെ ധൈര്യമായി നേരിടുക' ഡോ.ടി.സി.തോമസിന്റെ ഒന്നര വയസ്സിലാണ് അദ്ദേഹത്തിന് പോളിയോ പിടിപെട്ടത്.
ഇരുകാലുകള്ക്കും ബലക്ഷയമുണ്ട്. അന്ന് ചികിത്സയില് കഴിയവേ അവിടത്തെ ഡോക്ടര് പറഞ്ഞു- 'ഇവന് പഠിച്ചു മിടുക്കനായി ഡോക്ടറാകും'. ആശുപത്രിവാസത്തിനു ശേഷം വീട്ടിലെത്തിയപ്പോഴും തോമസിന്റെ അമ്മ ഈ വാക്കുകള് മറന്നില്ല. ഇക്കാര്യം ആവര്ത്തിച്ചു പറഞ്ഞാണ് മകനെ വളര്ത്തിയത്.
സഹോദരങ്ങള്ക്കൊപ്പം സൈക്കിളിന്റെ പിന്നിലിരുന്നായിരുന്നു സ്കൂള് യാത്രകള്. ഡോക്ടറാകണം എന്ന ലക്ഷ്യത്തോടെ എസ്ബി കോളജില് പ്രീഡിഗ്രി സെക്കന്ഡ് ഗ്രൂപ്പില് ചേര്ന്നു. അതോടെ യാത്ര ബസിലായി. മുകളിലത്തെ നിലകള് കയറിയിറങ്ങാന് സഹപാഠികളും അധ്യാപകരും താങ്ങായി. ആലപ്പുഴ മെഡിക്കല് കോളജില് നിന്നാണ് എംബിബിഎസ് നേടിയത്. 2 വര്ഷം അവിടെ ട്യൂട്ടറായി.
1994-ല് ഇന്ഷുറന്സ് മെഡിക്കല് സര്വീസില് പ്രവേശിച്ചു. ഇതിനിടെ കോട്ടയം മെഡിക്കല് കോളജില് നിന്നു ജനറല് മെഡിസിനില് എംഡിയും കരസ്ഥമാക്കി. ഇപ്പോള് കാറിലാണ് യാത്ര. അതിനായി ക്ലച്ചിന്റെ ഭാഗത്ത് ചെറിയ മാറ്റങ്ങള് വരുത്തി. നടക്കുമ്പോള് ഊന്നുവടി ഉപയോഗിക്കാറുണ്ട്.
കുറിച്ചി സ്വാമിക്കവലയ്ക്ക് സമീപമാണ് താമസം. ഭാര്യ: പ്രിയ. മക്കള്: ഡോ.ഒലിവിയ (തിരുനല്വേലി ഗവ.മെഡിക്കല് കോളജില് എംഡി വിദ്യാര്ഥിനി), ജൂലിയ (കോട്ടയം മെഡിക്കല് കോളജില് അവസാന വര്ഷ എംബിബിഎസ് വിദ്യാര്ഥിനി), ഫ്ലവിയ. ഫ്ലവിയയും പിതാവിന്റെയും സഹോദരിമാരുടെയും പാത പിന്തുടര്ന്ന് എംബിബിഎസിനു ചേരാനുള്ള തയാറെടുപ്പിലാണ്.
https://www.facebook.com/Malayalivartha