ഈ സമൂഹത്തിലെ ട്രാൻസ് സ്ത്രീകളുടെ അവസ്ഥയെ കുറിച്ചും അവർ നേരിടുന്ന ചൂഷണങ്ങളെ കുറിച്ചും തുറന്നെഴുതുകയാണ് അനുരാധ കൃഷ്ണൻ എന്ന യുവതി. എപ്പോഴും പുരുഷന്റെ കാമാസക്തിയെ ശമിപ്പിക്കാൻ ഒരുങ്ങിയിരിക്കുന്നവരാണ് ട്രാൻസ് സ്ത്രീകൾ എന്ന് പരക്കെ ഒരു ധാരണ ഉണ്ടെന്ന് അനുരാധ കുറിക്കുകയാണ്. സമ്മതം എന്നത് ജന്റർ വ്യത്യാസം ഇല്ലാതെ എല്ലാവർക്കും ലഭിക്കേണ്ട അവകാശമാണ് എന്നതാണ്. ട്രാൻസ്‌ജെന്റർ എന്നാൽ എപ്പോഴും ലഭ്യമാകുന്നവർ എന്നല്ല അർത്ഥമെന്നും അനുരാധ വ്യക്തമാക്കുകയാണ്.

ഫെയ്സ്ബുക്ക് കുറിപ്പ് ഇങ്ങനെ:

നമ്മളോട് ലൈംഗിക ആകർഷണം തോന്നുന്ന ഒരു വ്യക്തി, അതിനുള്ള സമ്മതം ചോദിക്കുക എന്നതൊക്കെ വലിയൊരു പ്രെവിലേജ് ആണ്. സ്ത്രീകളുടെ ഇടങ്ങളിലേക്ക് പോലും അത്തരം സമ്മതമില്ലാത്ത കടന്നുകയറ്റങ്ങൾ ധാരാളമായി ഉണ്ടാകാറുണ്ട്. നിയമങ്ങളെ ഭയന്നും, നാറുമെന്ന ഭയം കൊണ്ടും മാത്രം ചിലർ അത്തരം കടന്നുകയറ്റം ഒഴിവാക്കാറുണ്ട്. എന്നാൽ ഈ ആണത്ത സമൂഹത്തിലെ ട്രാൻസ് സ്ത്രീകളുടെ അവസ്ഥ എന്താണ് എന്ന് നിങ്ങൾ ആലോചിച്ചിട്ടുണ്ടോ?

ട്രാൻസ്‌ജെന്റർ എന്നതുകൊണ്ട് സമൂഹം കല്പിച്ചു തന്നിട്ടുള്ളത് ലൈംഗിക പരവേശം ഉള്ളവർ എന്നാണ്. അതുകൊണ്ട് തന്നെ അവർക്ക് സമ്മതം നൽകേണ്ട ആവശ്യമില്ല എന്നധാരണ. 24 മണിക്കൂറും സമ്മതം കൊണ്ടിരിക്കുന്നവർ, അവരോടു എപ്പോ വേണമെങ്കിലും സെക്സ് ചെയ്യാം, സെക്സ് ചാറ്റ് ചെയ്യാം, പൊതു ഇടങ്ങളിൽ കയറിപിടിക്കാം,എപ്പോഴും പുരുഷന്റെ കാമാസക്തിയെ ശമിപ്പിക്കാൻ ഒരുങ്ങിയിരിക്കുന്നവർ ആണ് ട്രാൻസ് സ്ത്രീകൾ എന്ന് പരക്കെ ഒരു ധാരണ ഉണ്ട്. ചില പുരുഷന്മാർ ഒരു ഔദാര്യം പോലെയും ഈ കൃത്യങ്ങൾ നടത്താറുണ്ട്.പ്രതികരിച്ചാൽ നീയൊക്കെ മറ്റേപണി ചെയ്യുന്നവർ അല്ലെ പിന്നെന്തിനാണിത്ര ജാഡ എന്ന മറുപടി ഉറപ്പാണ്...

മറ്റേപണി എന്നുദ്ദേശിച്ചത് ലൈംഗിക വൃത്തിയാണ്.. ലൈംഗിക വൃത്തി ചെയ്യുന്നവർക്ക് സമ്മതം വേണ്ട! അവർക്ക് അതിനുള്ള യോഗ്യത ഇല്ല. ഒരിക്കൽ ലൈംഗിക തൊഴിലാളിയായ ഒരു ട്രാൻസ്‌യുവതി ക്രൂരമായി പീഡിപ്പിക്കപ്പെട്ടു കൊലചെയ്യപ്പെട്ടപ്പോൾ സെക്സ് വർക്ക്‌ ചെയ്തു നടക്കുന്നവരെ ഇനി എന്ത് പീഡിപ്പിക്കാൻ ആണെന്ന് ചോദിച്ച ചില സുഹൃത്തുക്കൾ എനിക്കുണ്ടായിരുന്നു.ഇവരെയൊക്കെയാണ് കണ്സന്റ് എന്നാൽ എന്ത് എന്ന് പറഞ്ഞു പഠിപ്പിക്കാൻ ശ്രമിക്കുന്നത്...

ട്രാൻസ്‌ജെന്റർ മനുഷ്യർക്ക് എതിരെ ഉള്ള ലൈംഗിക അതിക്രമണങ്ങൾക്ക് കൃത്യമായ നിയമസംവിധാനങ്ങൾ ഇല്ലാത്തതുകൊണ്ട് തന്നെ സ്ത്രീകളോട് കാണിക്കുന്ന ദാക്ഷണ്യം ഇവറ്റകൾ ഞങ്ങളോട് കാണിക്കാറില്ല. അവർ വീണ്ടും ഇൻബോക്സിൽ ഉദ്ധരിച്ച ലിംഗങ്ങൾ അയച്ചുതരികയും,പൊതു ഇടങ്ങളിൽ കടന്നു പിടിക്കുകയും, നിരന്തരം ഫോണിൽ വിളിച്ചു ശല്യം ചെയ്യുകയും, അവഗണിച്ചാൽ പോസ്റ്റുകളിൽ വന്നു 9, കുണ്ടൻ വിളികൾ തുടരുകയും ചെയ്തുകൊണ്ടേയിരിക്കും.

ഞങ്ങളുടെ ശരീരത്തിൽ ഞങ്ങളെക്കാൾ അവകാശം അവർക്കാണ്. സമൂഹത്തിൽ നിലനിൽക്കാൻ കഷ്ടപ്പെടുന്ന ഓരോ ന്യുനപക്ഷ വിഭാഗത്തിന്റെയും ഗതി ഇതാണ്.മനുഷ്യരിലേക്ക് കടന്നുകയറാൻ ഉള്ള അവകാശം സമൂഹംതന്നെയാണ് അവർക്ക് കല്പിച്ചു കൊടുക്കുന്നതും.ഇൻബോക്സിൽ ലിംഗം അയച്ചവനെ സ്ക്രീൻ ഷോട്ട് എടുത്തു കാണിച്ചാൽ, നീ എന്തിനാ മെസ്സേജ് ഇട്ടത്, ബ്ലോക്ക് ആക്കികൂടെ, നീ മെസ്സേജ് അയച്ചിട്ടല്ലേ എന്നൊക്കെ നിങ്ങൾ തന്നെ പറയും.പൊതു ഇടത്തിൽ ആരെങ്കിലും ലൈംഗിക ചൊവ്വയോടെ സംസാരിക്കുകയോ കയറിപ്പിടിക്കുകയോ ചെയ്തൽ നീയൊക്കെ ഇങ്ങനെ വേഷം കെട്ടി നടന്നിട്ടല്ലേ എന്ന് നിങ്ങൾ തന്നെ പറയും.

ഇത്തരത്തിൽ ഞങ്ങളുടെ ഇടങ്ങളിലും, ശരീരത്തിലും, അഭിമാനത്തിലും മേലുള്ള സർവ്വ അധികാരങ്ങളും നിങ്ങൾ ഭൂരിപക്ഷ വിഭാഗങ്ങൾ തന്നെ തീരുമാനിച്ചു അവർക്ക് പതിച്ചു നൽകും....ഇതാണ് സമ്മതം എന്ന വാക്കിന്റെ നിലവിലെ പരിതസ്ഥിതി...പ്രായപൂർത്തി(കുട്ടികളെ സംബന്ധിച്ച് നിയമപരമായി എല്ലാത്തരം ലൈംഗിക കടന്നുകയറ്റങ്ങളും POCSO നിയമത്തിന് കീഴിൽ വരുന്നതാണ് )ആയ വ്യക്തികളിൽ സമ്മതമില്ലാതെയുള്ള ഓരോ ലൈംഗിക കടന്നുകയറ്റങ്ങളും റേപ്പ് ആണ്. ഈ ലോകത്ത് ട്രാൻസ് സ്ത്രീകളും നിരന്തരം ഇത്തരം കടന്നുകയറ്റങ്ങൾക്കും പീഡനങ്ങൾക്കും ഇരയാകുന്നുണ്ട്. ട്രാൻസ്‌ജെന്റർ എന്നാൽ എപ്പോഴും ലഭ്യമാകുന്നവർ എന്നല്ല അർത്ഥം.

Nb:സമ്മതം എന്നത് ജന്റർ വ്യത്യാസം ഇല്ലാതെ എല്ലാവർക്കും ലഭിക്കേണ്ട അവകാശമാണ്. സമ്മതമില്ലാതെ ആണുങ്ങളോട് ഇടപെടുന്ന സ്ത്രീകളെയും ട്രാൻസ്ജന്റർ ആളുകളെയും മറന്നതല്ല. ഒരു പിതൃമേധാവിത്ത സമൂഹത്തിൽ നിലവിലെ സാഹചര്യത്തിൽ ഇങ്ങനെയേ ഈ സാഹചര്യത്തെ പറഞ്ഞുവയ്ക്കുവാൻ സാധിക്കു....അകുമ്മ ....