കൊല്‍ക്കത്ത നൈറ്റ് റൈഡേഴ്‌സിനെതിരെ മുംബൈ ഇന്ത്യന്‍സിന് 8 വിക്കറ്റിന്റെ തകര്‍പ്പന്‍ ജയം. ഇതോടെ പോയിന്റ് പട്ടികയില്‍ മുംബൈ ഇന്ത്യന്‍സ് വീണ്ടും ഒന്നാം സ്ഥാനത്തെത്തി. കെ കെ ആര്‍ ഉയര്‍ത്തിയ 149 റണ്‍സ് വിജയലക്ഷ്യം 16.5 ഓവറില്‍ 2 വിക്കറ്റ് മാത്രം നഷ്ടത്തില്‍ മുംബൈ മറികടന്നു. ക്വിന്റന്‍ ഡി കോക്കും (പുറത്താകാതെ 78 റണ്‍സ്) രോഹിത് ശര്‍മയും (35 റണ്‍സ്) ചേര്‍ന്ന് ഉയര്‍ത്തിയ 94 റണ്‍സ് ഓപ്പണിങ് കൂട്ടുകെട്ടാണ് മുംബൈയുടെ വിജയം ഉറപ്പിച്ചത്.

149 റണ്‍സ് വിജയലക്ഷ്യം പിന്തുടര്‍ന്ന് ബാറ്റിങ് ആരംഭിച്ച രോഹിത് ശര്‍മ -ക്വിന്റന്‍ ഡി കോക്ക് സഖ്യം തുടക്കം മുതല്‍ ആക്രമിച്ചാണ് കളിച്ചത്. സിക്‌സറുകളും ഫോറുകളും പായിച്ച് ഇരുവരും സ്‌കോര്‍ അതിവേഗം ഉയര്‍ത്തി. അഞ്ചാം ഓവറില്‍ ഡി കോക്കിനെ ക്യാച്ചിലൂടെ പുറത്താക്കാനുള്ള അവസരം വരുണ്‍ ചക്രവര്‍ത്തി നഷ്ടപ്പെടുത്തി. ആറാം ഓവറില്‍ മുംബൈ സ്‌കോര്‍ 50 കടന്നു. തുടര്‍ന്ന് 25 പന്തില്‍ രണ്ടു സിക്‌സും എട്ടു ഫോറുമുള്‍പ്പെടെ ഡി കോക്ക് അര്‍ധസെഞ്ചുറിയിലെത്തി. 10 ഓവര്‍ പൂര്‍ത്തിയായപ്പോള്‍ മുംബൈ വിക്കറ്റ് നഷ്ടം കൂടാതെ 90 റണ്‍സ്. പിന്നാലെ ശിവം മാവിയുടെ ബോളിങ്ങില്‍ ദിനേഷ് കാര്‍ത്തിക്ക് ക്യാച്ചെടുത്ത് രോഹിത് ശര്‍മയെ (36 പന്തില്‍ ഒരു സിക്‌സും 5 ഫോറുമുള്‍പ്പെടെ 35 റണ്‍സ്) പുറത്താക്കി.

അടുത്ത ഊഴം സൂര്യകുമാര്‍ യാദവിന്റേതായിരുന്നു. യാദവിനെ (10 റണ്‍സ്) വരുണ്‍ ചക്രവര്‍ത്തി ബൗള്‍ഡാക്കി. തുടര്‍ന്ന് ഹാര്‍ദിക് പാണ്ഡ്യയുമായി ചേര്‍ന്ന് ഡി കോക്ക് മുംബൈയെ വിജയത്തിലെത്തിച്ചു. ഡി കോക്ക് 44 പന്തില്‍ 3 സിക്‌സും 9 ഫോറുകളുമുള്‍പ്പെടെ 78 റണ്‍സോടെയും ഹാര്‍ദിക് പാണ്ഡ്യ 11 പന്തില്‍ 1 സിക്‌സും 3 ഫോറുകളുമുള്‍പ്പെടെ 21 റണ്‍സോടെയും പുറത്താകാതെ നിന്നു. കൊല്‍ക്കത്തയ്ക്കു വേണ്ടി ശിവം മാവി, വരുണ്‍ ചക്രവര്‍ത്തി എന്നിവര്‍ ഓരോ വിക്കറ്റ് വീതം നേടി.

ടോസ് നേടി ബാറ്റിങ് തിരഞ്ഞെടുത്ത കൊല്‍ക്കത്ത നൈറ്റ് റൈഡേഴ്‌സിന്റെ ടീം സ്‌കോര്‍ 18 ആയപ്പോഴേക്കും രാഹുല്‍ ത്രിപാഠി പുറത്തായി. 7 റണ്‍സ് മാത്രമെടുത്ത ത്രിപാഠിയെ ട്രെന്റ് ബോള്‍ട്ടിന്റെ ബോളിങ്ങില്‍ സൂര്യകുമാര്‍ യാദവ് ക്യാച്ചെടുക്കുകയായിരുന്നു. വൈകാതെ നിതീഷ് റാണ (5 റണ്‍സ്) നാഥാന്‍ കോല്‍ട്രനൈലിന്റെ പന്തില്‍ ക്വിന്റന്‍ ഡി കോക്ക് ക്യാച്ചെടുത്ത് പുറത്തായി.

രാഹുല്‍ ചഹാര്‍ എറിഞ്ഞ എട്ടാം ഓവറിന്റെ അടുത്തടുത്ത പന്തുകളില്‍ ശുഭ്മാന്‍ ഗില്ലും (23 പന്തില്‍ 21 റണ്‍സ്), ദിനേഷ് കാര്‍ത്തിക്കും (4 റണ്‍സ്) പുറത്ത്. ശുഭ്മാന്‍ ഗില്ലിന്റെ ഷോട്ട് കിറോണ്‍ പൊള്ളാര്‍ഡിന്റെ കൈകളിലൊതുങ്ങിയപ്പോള്‍ ദിനേഷ് കാര്‍ത്തിക്ക് ബൗള്‍ഡാകുകയായിരുന്നു. ഒന്‍പതാം ഓവറില്‍ കൊല്‍ക്കത്ത സ്‌കോര്‍ 50 കടന്നു. സ്‌കോര്‍ 61 ല്‍ എത്തിനില്‍ക്കെ ആന്‍ന്ദ്രെ റസല്‍ (12 റണ്‍സ്) ജസ്പ്രീത് ബുമ്രയുടെ ബോളിങ്ങില്‍ ക്വിന്റന്‍ ഡി കോക്കിനു ക്യാച്ച് നല്‍കി മടങ്ങി.

തുടര്‍ന്ന് ഒയിന്‍ മോര്‍ഗനും പാറ്റ് കമ്മിന്‍സും ഒരുമിച്ചു. 17 ാം ഓവറിലാണ് കൊല്‍ക്കത്ത സ്‌കോര്‍ 100 കടന്നത്. പാറ്റ് കമ്മിന്‍സ് ആക്രമിച്ചു കളിച്ചപ്പോള്‍ ഒയിന്‍ മോര്‍ഗന്‍ സിംഗിളുകള്‍ നേടി സ്‌കോര്‍ ചലിപ്പിച്ചു. ഇതിനിടെ ഒയിന്‍ മോര്‍ഗനും പാറ്റ് കമ്മിന്‍സും ചേര്‍ന്നുള്ള കൂട്ടുകെട്ട് 50 റണ്‍സ് പിന്നിട്ടു.
19 ാം ഓവറില്‍ കൊല്‍ക്കത്ത 14 റണ്‍സ് നേടി. അവസാന ഓവറില്‍ പാറ്റ് കമ്മിന്‍സ് അര്‍ധസെഞ്ചുറി പൂര്‍ത്തിയാക്കി. അവസാന ഓവറില്‍ രണ്ടു സിക്‌സും ഒരു ഫോറുമുള്‍പ്പെടെ 21 റണ്‍സാണ് കൊല്‍ക്കത്ത നേടിയത്. ഇന്നിങ്‌സ് അവസാനിച്ചപ്പോള്‍ കൊല്‍ക്കത്ത 20 ഓവറില്‍ 5 വിക്കറ്റ് നഷ്ടത്തില്‍ 148 റണ്‍സെടുത്തു. മുംബൈയ്ക്കു വേണ്ടി രാഹുല്‍ ചഹാര്‍ 2 വിക്കറ്റും, ജസ്പ്രീത് ബുമ്ര, ട്രെന്റ് ബോള്‍ട്ട്, നാഥാന്‍ കോല്‍ട്രനൈല്‍ എന്നിവര്‍ ഓരോ വിക്കറ്റ് വീതവും നേടി.