ഇന്ത്യയും ശ്രീലങ്ക തമ്മിലുള്ള മൂന്നാം ഏകദിന ക്രിക്കറ്റ് മത്സരം ഇന്ന് കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ നടക്കും. മൂന്ന് മത്സര പരമ്പരയിലെ അവസാന ഏകദിനമാണിത്. കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തിലെ അഞ്ചാമത്തെ അന്താരാഷ്ട്ര മത്സരമാണിത്.

ആദ്യ രണ്ട് കളികളും ജയിച്ച് ഇന്ത്യ പരമ്പര കീശയിലാക്കിക്കഴിഞ്ഞു. രോഹിത് ശര്‍മ്മ നയിക്കുന്ന ഇന്ത്യന്‍ ടീമില്‍ വിരാട് കൊഹ്ലി, കെ.എല്‍ രാഹുല്‍, ഹാര്‍ദിക് പാണ്ഡ്യ മുഹമ്മദ് ഷമി,കുല്‍ദീപ് യാദവ് തുടങ്ങിയ സീനിയര്‍ താരങ്ങളും സൂര്യകുമാര്‍ യാദവ്,ഇഷാന്‍ കിഷന്‍ ഉമ്രാന്‍ മാലിക്ക്,ശുഭ്മാന്‍ ഗില്‍ തുടങ്ങിയ യുവതാരങ്ങളും അണിനിരക്കുകയും ചെയ്യും. ആള്‍റൗണ്ടര്‍ ദാസുന്‍ ഷനകയാണ് ലങ്കയെ നയിക്കുന്നത്.

ഇന്ത്യന്‍ താരങ്ങള്‍ ഇന്നലെ ശ്രീ പത്മനാഭ സ്വാമി ക്ഷേത്രത്തില്‍ ദര്‍ശനം നടത്തുകയും ചെയ്തു.ലങ്കന്‍ ടീം ഉച്ചയോടെയും ഇന്ത്യന്‍ ടീം വൈകുന്നേരത്തോടെയും ഗ്രീന്‍ഫീല്‍ഡില്‍ പരിശീലനത്തിനെത്തി.

അതേസമയം പട്ടിണിപ്പാവങ്ങള്‍ ക്രിക്കറ്റ് കാണേണ്ടെന്ന കായികമന്ത്രിയുടെ വിവാദപ്രസ്താവനയോടെ മത്സരത്തിന്റെ ടിക്കറ്റ് വില്‍പ്പന കുറഞ്ഞിരുന്നു. കഴിഞ്ഞ മത്സരങ്ങളിലേതുപോലെ വലിയ തിരക്ക് ഇന്ന് ഗ്രീന്‍ഫീല്‍ഡില്‍ കാണാനിടയില്ലെന്നാണ്‌സൂചനകള്‍. മത്സരം ഉച്ചയ്ക്ക് 1.30 ന് തുടങ്ങും. കാണികള്‍ക്ക് 11.30 മുതല്‍ പ്രവേശനമുണ്ടായിരിക്കും.