രഞ്ജിട്രോഫി ക്രിക്കറ്റ് ചാമ്പ്യന്‍ഷിപ്പില്‍ കേരളം ഇന്ന് കരുത്തരായ കര്‍ണാടകക്കെതിരെ ഇറങ്ങും. എലൈറ്റ് ഗ്രൂപ് സിയില്‍ കര്‍ണാടകയാണ് 26 പോയന്റുമായി മുന്നില്‍.

19 പോയന്റുമായി കേരളം രണ്ടാംസ്ഥാനത്താണ്. തുമ്പ സെന്റ് സേവ്യേഴ്‌സ് കെ.സി.എ ഗ്രൗണ്ടില്‍ ജനുവരി 20 വരെയാണ് മത്സരം. സിജോമോന്‍ ജോസഫ് തന്നെയാണ് കേരള ക്യാപ്റ്റന്‍. അവസാന മത്സരത്തില്‍ സര്‍വിസസിനെതിരെ നേടിയ വമ്പന്‍ ജയത്തിന്റെ ആത്മവിശ്വാസത്തിലാണ് കേരളം.

ഗ്രൂപ്പില്‍ ഝാര്‍ഖണ്ഡ്, ഛത്തിസ്ഗഢ്, സര്‍വിസസിനെതിരെ ജയവും രാജസ്ഥാനോട് സമനിലയും നേടിയ കേരളം ഗോവക്കെതിരെ പരാജയപ്പെട്ടിട്ടുണ്ടായിരുന്നു.