ബ്രസീലിനെ മുട്ടുകുത്തിച്ച് അര്‍ജന്റീന... ലയണല്‍ മെസിയുടെ ഏക ഗോളില്‍ അര്‍ജന്റീനയ്ക്ക് ജയം
സൗഹൃദ മത്സരത്തില്‍ ബ്രസീലിനെ മുട്ടുകുത്തിച്ച് അര്‍ജന്റീന. വിലക്കിനുശേഷം മടങ്ങിയെത്തിയ ലയണല്‍ മെസി നേടിയ ഏക ഗോളിലായിരുന്നു അര്‍ജന്റീനയുടെ ജയം. 13-ാം മിനിറ്റിലായിരുന്നു മെസിയുടെ ഗോള്‍ പിറന്നത്.ഒരു പെനാല്‍റ്റി നഷ്ടപ്പെടുത്തിയതും ഒരു പെനാല്‍റ്റി വഴങ്ങിയതുമാണു ബ്രസീലിന് തിരിച്ചടിയായത്. മത്സരത്തിന്റെ എട്ടാം മിനിറ്റില്‍ ബ്രസീലിനു ലഭിച്ച പെനാല്‍റ്റി ഗബ്രിയേല്‍ ജീസസ് പുറത്തേക്ക് അടിച്ചുകളഞ്ഞു. അധികംവൈകാതെ അര്‍ജന്റീനയ്ക്കും പെനാല്‍റ്റി ലഭിച്ചു.
മെസിയെടുത്ത പെനാല്‍റ്റി കിക്ക് ബ്രസീല്‍ ഗോള്‍ കീപ്പര്‍ അലിസന്‍ തട്ടിയകറ്റിയെങ്കിലും മെസിയുടെ കാലിലേക്കു തന്നെയാണു പന്തെത്തിയത്. റീബൗണ്ട് പിടിച്ചെടുത്ത മെസി പോസ്റ്റിന്റെ ഇടത് മൂലയിലേക്കു പായിച്ച് അര്‍ജന്റീനയെ മുന്നിലെത്തിച്ചു. ആദ്യ പകുതിയില്‍ പന്തു കൂടുതല്‍ സമയം ബ്രസീലാണു കൈവശം വച്ചതെങ്കിലും നല്ല അവസരങ്ങള്‍ സൃഷ്ടിക്കാനായില്ല.
അര്‍ജന്റീനയാകട്ടെ കിട്ടിയ അവസരങ്ങളില്‍ ആക്രമിച്ചു. ഇതിന്റെ ഫലം ടീമിനു ലഭിക്കുകയും ചെയ്തു. റിയാദിലെ കിംഗ് സൗദ് സ്റ്റേഡിയത്തില്‍ നടന്ന മത്സരത്തില്‍ സൂപ്പര്‍ താരം നെയ്മറില്ലാതെയാണു ബ്രസീല്‍ ഇറങ്ങിയത്.
https://www.facebook.com/Malayalivartha
