ഇരുപത്തിയെട്ട് വര്ഷം നീണ്ട പ്രൊഫഷണല് ടെന്നീസ് കരിയറില് നിന്നും വിരമിക്കല് പ്രഖ്യാപിച്ച് ഇന്ത്യന് ടെന്നീസ് ഇതിഹാസം ലിയാന്ഡര് പേസ്
ഇരുപത്തിയെട്ടു വര്ഷം നീണ്ട പ്രൊഫഷണല് ടെന്നീസ് കരിയറില് നിന്നും വിരമിക്കല് പ്രഖ്യാപിച്ച് ഇന്ത്യന് ടെന്നീസ് ഇതിഹാസം ലിയാന്ഡര് പേസ്. 2020 തന്റെ വിടവാങ്ങല് വര്ഷമായിരിക്കുമെന്ന് ക്രിസ്തുമസ് ആശംസകളറിയിച്ച്ക്കൊണ്ട് ട്വിറ്ററിലൂടെ പുറത്ത് വിട്ട പ്രസ്താവനയില് പേസ് അറിയിച്ചു.'2020-ല് തിരഞ്ഞെടുത്ത കുറച്ച് മത്സരങ്ങളില് മാത്രമേ കളിക്കുകയുള്ളൂ. തന്റെ ടീമിനൊപ്പം യാത്ര ചെയ്യും. തന്റെ എല്ലാ സുഹൃത്തുക്കള്ക്കും ആരാധകര്ക്കുമൊപ്പം 2020 ആഘോഷിക്കും'. തനിക്ക് പ്രചോദനവും പിന്തുണയും നല്കിയ മാതാപിതാക്കള്, സഹോദരിമാര്, മകള് അയാന എന്നിവര്ക്കും പേസ് നന്ദി അറിയിച്ചു.ഏഴ് ഒളിമ്പിക്സില് പങ്കെടുത്ത ഏക ടെന്നീസ് കളിക്കാരനാണ് പേസ്. 1996 ലെ അറ്റലാന്റ ഒളിമ്പിക്സില് സിംഗിള്സില് ഇന്ത്യക്കായി വെങ്കല മെഡല് നേടിയ താരമാണ് പേസ്.
പുരുഷ ഡബിള്സില് 1999, 2001, 2009 വര്ഷങ്ങളില് ഫ്രഞ്ച് ഓപ്പണും 2006, 2009, 2013 വര്ഷങ്ങളില് യു.എസ് ഓപ്പണും അദ്ദേഹം നേടിയിട്ടുണ്ട്. 2012 ല് ആസ്ട്രേലിയന് ഓപ്പണ് ഡബിള്സ് കിരീടം നേടിയ പേസ് 1999ല് വിംബിള്ഡണും നേടി. മിക്സഡ് ഡബിള്സില് 2003, 2010, 2015 വര്ഷങ്ങളില് ആസ്ട്രേലിയന് ഓപ്പണ്, 2016ല് ഫ്രഞ്ച് ഓപ്പണ്, 2015ല് വിംബിള്ഡണ്, 2008, 2015 വര്ഷങ്ങളില് യു.എസ് ഓപ്പണ് എന്നിവയും അദ്ദേഹം കരസ്ഥമാക്കി. 43 വിജയങ്ങളുമായി ഏറ്റവും കൂടുതല് ഡേവിസ് കപ്പ് ഡബിള്സ് വിജയങ്ങളെന്ന റെക്കോര്ഡും പേസിന്റെ പേരിലാണ്.
എടിപി ഡബിള്സ് റാങ്കിംഗ് പ്രകാരം നിലവില് ലോകത്ത് 105ാം സ്ഥാനത്താണ് 46 കാരനായ ഇന്ത്യന് താരം. രാജീവ് ഗാന്ധി ഖേല് രത്ന, അര്ജ്ജുന, പത്മശ്രീ, പത്മഭൂഷന് തുടങ്ങിയ പുരസ്കാരങ്ങള് നല്കി രാജ്യം ആദരിച്ചിട്ടുണ്ട്.
https://www.facebook.com/Malayalivartha