ടോക്യോ ഒളിമ്പിക്സിലെ ഇന്ത്യയുടെ സ്വർണ്ണമെഡൽ പ്രതീക്ഷകൾ അസ്തമിച്ചു. ഒളിമ്ബിക്സ് ഭാരദ്വോഹനത്തില്‍ ഇന്ത്യയുടെ മീരാഭായ് ചാനു നേടിയ വെള്ളി മെഡല്‍ സ്വര്‍ണമാകുമെന്ന പ്രതീക്ഷകള്‍ ഇതോടെ അവസാനിച്ചു. ചൈനീസ് താരത്തിന്റെ പരിശോധന കഴിഞ്ഞതോടെയാണിത്. സ്വര്‍ണം നേടിയ ചൈനീസ് താരം ഉത്തേജകം ഉപയോഗിച്ചതായി സംശയമുയര്‍ന്നതിനാല്‍ ചാനുവിന്റെ വെള്ളി നേട്ടം സ്വര്‍ണമായേക്കുമെന്നു നേരത്തെ റിപ്പോര്‍ട്ടുകള്‍ ഉണ്ടായിരുന്നു.

അതേസമയം ചൈനീസ് താരം ഉത്തേജക മരുന്ന് ഉപയോഗിച്ചതായി കണ്ടെത്താനായില്ലെന്നാണ് ഫലം വന്നിരിക്കുന്നത്. അന്താരാഷ്ട്ര പരിശോധന ഏജന്‍സിയാണ് ഇക്കാര്യം പ്രസ്താവനയിലൂടെ അറിയിച്ചത്. ഉത്തേജക മരുന്ന് ഉപയോഗിച്ചതായി ആരോപണം ഉയര്‍ന്നവരുടെ പേരുകള്‍ രഹസ്യമാക്കി വയ്ക്കാറില്ലെന്നും ഏജന്‍സിയുടെ പ്രസ്താവനയില്‍ പറയുന്നു. മത്സര ശേഷം ചൈനീസ് താരത്തോട് ടോക്യോയില്‍ തന്നെ തുടരാന്‍ പരിശോധന ഏജന്‍സി നിര്‍ദേശിച്ചിരുന്നു. മത്സരത്തില്‍ 210 കിലോ ഉയര്‍ത്തിയാണ് ചൈനയുടെ ഹോ സുഹ്യു സ്വര്‍ണം നേടിയത്. ഒളിമ്ബിക്സ് റെക്കോര്‍ഡ് ആണ് 210 കിലോ ഉയര്‍ത്തി ചൈനീസ് താരം ടോക്യോയില്‍ ഇത്തവണ കുറിച്ചത്. സ്‌നാച്ചില്‍ 94 കിലോഗ്രാം എന്ന പുതിയ ഒളിമ്ബിക് റെക്കോര്‍ഡ് സ്ഥാപിച്ച സുഹ്യു, ക്ലീന്‍ ആന്റ് ജെര്‍ക്കില്‍ 116 കിലോയുമായി മറ്റൊരു ഒളിമ്ബിക് റെക്കോര്‍ഡ് കൂടി സ്വന്തം പേരില്‍ ചേര്‍ത്തു. സ്‌നാച്ചില്‍ മീരഭായ് 87ഉം ക്ലീന്‍ ആന്റ് ജെര്‍ക്കില്‍ 115ഉം ഉയര്‍ത്തി. അവസാന ശ്രമത്തില്‍ 117 കിലോ ഉയര്‍ത്തിയെങ്കിലും മീരാഭായിക്ക് ലിഫ്റ്റ് പൂര്‍ത്തിയാക്കാന്‍ കഴിഞ്ഞില്ല.

വനിതകളുടെ 49 കിലോഗ്രാം വിഭാഗത്തില്‍ 202 കിലോഗ്രാം ഉയര്‍ത്തിയാണ് 26കാരിയായ ചാനു ടോക്യോ ഒളിമ്ബിക്സില്‍ ഇന്ത്യയുടെ ആദ്യ മെഡല്‍ നേടിയത്. 2000ല്‍ സിഡ്നി ഒളിമ്ബിക്സില്‍ വെങ്കലം നേടിയ കര്‍ണ മല്ലേശ്വരിക്കു ശേഷം ഒളിമ്ബിക്സില്‍ ഭാരോദ്വഹനത്തില്‍ മെഡല്‍ നേടുന്ന ആദ്യ ഇന്ത്യന്‍ താരമായി ചാനു മാറി.

2016ല്‍ റിയോ ഒളിമ്ബിക്സില 48 കിലോ വിഭാഗം ഭാരോദ്വാഹന മത്സരത്തില്‍ ആറു ശ്രമങ്ങളില്‍ ഒരിക്കല്‍ മാത്രമായിരുന്നു മീരഭായിക്ക് ലക്ഷ്യം ഉയര്‍ത്താനായത്. അന്ന് നിറഞ്ഞ കണ്ണുകളുമായി തല കുനിച്ച്‌ മടങ്ങിയ മീരാഭായ് ചാനുവിന് അഞ്ചുവര്‍ഷങ്ങള്‍ക്കിപ്പുറം ടോക്യോവില്‍ സ്വപ്നം നിറവേറിയിരിക്കുകയാണ്. മെഡല്‍ പട്ടികയില്‍ തന്റെ രാജ്യത്തെ രണ്ടാം സ്ഥാനത്തെത്തിച്ച വെള്ളി മെഡല്‍ നേട്ടമാണ് മീര സ്വന്തമാക്കിയത്. ഒളിമ്ബിക്സ് ചരിത്രത്തില്‍ ആദ്യമായി ആയിരുന്നു ഇന്ത്യ മെഡല്‍ പട്ടികയില്‍ രണ്ടാമത് എത്തിയത്.