ഒളിംപ്ക്സില്‍ ഇന്ത്യന്‍ പ്രതീക്ഷകള്‍ക്ക് കനത്ത തിരിച്ചടി സമ്മാനിച്ച്‌ ബാഡ്മിന്റണ്‍ സെമിയില്‍ പി വി സിന്ധുവിന് തോല്‍വി. തികച്ചും ഏകപക്ഷീയമായി മാറിയ മത്സരത്തില്‍ മുന്‍ ലോക ഒന്നാം നമ്ബര്‍ താരം ചൈനീസ് തായ്‌പേയിയുടെ തായ് സു യിങ്ങാണ് നേരിട്ടുള്ള സെറ്റുകള്‍ക്ക് സിന്ധുവിനെ തോല്‍പ്പിച്ചത്. സ്‌കോര്‍: 21-18, 21-13.

ആദ്യ സെറ്റില്‍ പൊരുതി നോക്കിയ സിന്ധുവിനെ കാഴ്ചക്കാരിയാക്കിയാണ് രണ്ടാം സെറ്റിലെ തകര്‍പ്പന്‍ പ്രകടനത്തിലൂടെ ടോക്കിയോയില്‍ രണ്ടാം സീഡ് കൂടിയായ തായ് സു യിങ് സെറ്റും മത്സരവും സ്വന്തമാക്കിയത്.

കലാശപ്പോരില്‍ ചൈനയുടെ ലോക ഒന്നാം നമ്ബര്‍ താരവും ടോപ് സീഡുമായ ചെന്‍ യു ഫെയിയാണ് തായ് സു യിങ്ങിന്റെ എതിരാളി. ചൈനീസ് താരങ്ങള്‍ തമ്മിലുള്ള ആദ്യ സെമിയില്‍ ഹി ബിങ് ജിയാവോയെ ഒന്നിനെതിരെ രണ്ടു സെറ്റുകള്‍ക്കാണ് ചെന്‍ യു ഫെയി വീഴ്ത്തിയത് സ്‌കോര്‍: 21-16, 13-21, 21-12. വെങ്കല മെഡലിനായുള്ള മത്സരത്തില്‍ സിന്ധുവും ആദ്യ സെമിയില്‍ തോറ്റ ഹി ബിങ് ജിയാവോയും തമ്മില്‍ ഏറ്റുമുട്ടും.