മറ്റൊരാളുടെ അക്കൗണ്ടില്‍ പണം നിക്ഷേപിക്കുന്നതിന് നിബന്ധനയുമായി എസ്ബിഐ. പണം അടക്കുന്ന ചലാനില്‍ അക്കൗണ്ട് ഉടമയുടെ ഒപ്പോ സമ്മതപത്രമോ പണം അടക്കാന്‍ വരുന്നയാള്‍ക്ക് പാന്‍ കാര്‍ഡുമായി ബന്ധിപ്പിച്ച എസ്.ബി.ഐ അക്കൗണ്ടോ വേണം എന്ന നിബന്ധനയാണ് ഏര്‍പ്പെടുത്തിയത്. ഇതു സംബന്ധിച്ച് ശാഖകള്‍ക്ക് സര്‍ക്കുലര്‍ ലഭിച്ചു. ഇടപാടുകാരുടെ അറിവിലേക്കായി ശാഖകളില്‍ നോട്ടീസ് പ്രദര്‍ശിപ്പിച്ചിട്ടുണ്ട്. ബാങ്ക് അക്കൗണ്ട് വഴിയുള്ള തട്ടിപ്പ് തടയാനാണ് ഈ നിബന്ധനയെന്നാണ് ബാങ്കുമായി ബന്ധപ്പെട്ട വൃത്തങ്ങള്‍ പറയുന്നത്. അക്കൗണ്ട് ഉടമ അറിയാതെ ഒരു ഇടപാടും നടക്കാന്‍ പാടില്ല.

സംശയമുള്ള അക്കൗണ്ടുകള്‍ പരിശോധിക്കുമ്പോള്‍ ഇടപാടുകളെക്കുറിച്ച് വ്യക്തമായ വിവരങ്ങള്‍ നല്‍കാന്‍ ഉടമക്ക് കഴിയണം. അതിനൊപ്പം, അക്കൗണ്ടില്‍ പണം നിക്ഷേപിക്കുന്നതു പോലുള്ള ഇടപാടുകള്‍ പരമാവധി നിരുത്സാഹപ്പെടുത്തുകയും നെറ്റ് ബാങ്കിങ് പോലുള്ള പണരഹിത ഇടപാടുകള്‍ പ്രോത്സാഹിപ്പിക്കുകയും ചെയ്യുകയെന്ന ലക്ഷ്യംകൂടി ഇതിനുണ്ടെന്നും പറയുന്നു.
അതേസമയം, ഡിജിറ്റല്‍ ഇടപാടിലൂടെയല്ലാതെ പണ വിനിമയം നടത്തുന്നവര്‍ ഇപ്പോഴും വളരെ അധികമാണെന്ന് ബാങ്ക് വൃത്തങ്ങള്‍ ചൂണ്ടിക്കാട്ടുന്നു. അടുത്ത ബന്ധുക്കളുടെയും മറ്റും അക്കൗണ്ടില്‍ പണം നിക്ഷേപിക്കുന്നവര്‍ ധാരാളമുണ്ട്. എസ്.ബി.ഐയുടേതല്ലാത്ത ഉപഭോക്താക്കള്‍ മറ്റൊരാളുടെ എസ്.ബി.ഐ അക്കൗണ്ടില്‍ പണം നിക്ഷേപിക്കുന്നതും സാധാരണമാണ്. അത്തരക്കാര്‍ പാന്‍ ബന്ധിപ്പിച്ച എസ്.ബി.ഐ അക്കൗണ്ട് തുടങ്ങണമെന്നും അല്ലെങ്കില്‍ അക്കൗണ്ട് ഉടമയുടെ ഒപ്പോ സമ്മതപത്രമോ വേണമെന്ന് പറയുന്നതും പ്രായോഗിക ബുദ്ധിമുട്ട് സൃഷ്ടിക്കുമെന്ന് ബാങ്കുമായി ബന്ധപ്പെട്ടവര്‍തന്നെ പറയുന്നു.