രാജ്യാന്തര വിപണിയില്‍ റബറിന്റെ വില കുറഞ്ഞതും ഇറക്കുമതി വര്‍ധിച്ചതും മൂലം റബറിന്റെ വില ഇടിയുന്നു. ഓഗസ്റ്റില്‍ കിലോഗ്രാമിനു 134 രൂപ വരെ എത്തിയ റബറിന്റെ വില ഇപ്പോള്‍ 121 രൂപയിലേക്കു താഴ്ന്നു. ലാറ്റെക്‌സ് വില 146ല്‍ നിന്നു 108 രൂപയായി. നവംബര്‍ മുതല്‍ ജനുവരി വരെയാണ് റബര്‍ ഉല്‍പാദന സീസണ്‍. സീസണ്‍ തുടങ്ങി വിപണിയില്‍ റബര്‍ എത്തുന്നതോടെ വില ഇടിയാറുണ്ട്.

ഈ വര്‍ഷം റബര്‍ ഇറക്കുമതിയില്‍ 20 ശതമാനത്തിന്റെ വര്‍ധനവുണ്ടായി. ഇതുവരെ 3.63 ലക്ഷം ടണ്‍ റബറാണ് ഇറക്കുമതി ചെയ്തത്. നടപ്പു വര്‍ഷം 12 ലക്ഷം ടണ്ണിന്റെ വിവിത തരം റബര്‍ നിര്‍മാണ മേഖലയ്ക്ക് ആവശ്യമുണ്ട്. എന്നാല്‍ ആഭ്യന്തര ഉല്‍പാദനം 5 ലക്ഷം ടണ്‍ മാത്രമേ വരു. എന്നാല്‍ വിലയിടിവ് റബര്‍ കര്‍ഷകര്‍ക്ക് ഇരുട്ടടിയായി. ചരക്കുസേവന നികുതികൂടി വന്നതോടെ മരമൊന്നിന് ശരാശരി 6 രൂപയുടെ അധിക ചെലവുകൂടി വന്നത് കര്‍ഷകര്‍ക്ക് തിരിച്ചടിയായി.