ഇലക്ട്രിക് വാഹനങ്ങള്‍ പ്രോത്സാഹിപ്പിക്കുന്നതിന്റെ ഭാഗമായി പുതിയ പെട്രോള്‍ ഡീസല്‍ വാഹനങ്ങള്‍ക്ക് 12000 രൂപ ലെവി ചുമത്താന്‍ കേന്ദ്രസര്‍ക്കാര്‍ നീക്കം. വായുമലിനീകരണം കൂടുതലുള്ള പെട്രോള്‍ ഡീസല്‍ വാഹനങ്ങള്‍ക്ക് ലെവി ചുമത്താനുളള സാധ്യതയാണ് സര്‍ക്കാര്‍ തേടുന്നത്. ഇലക്ട്രിക് വാഹനങ്ങള്‍ പ്രോത്സാഹിപ്പിക്കാന്‍ ഫണ്ട് കണ്ടെത്തുന്നതിന്റെ ഭാഗമായാണ് കേന്ദ്രസര്‍ക്കാരിന്റെ ഈ നീക്കം. 

ഈ ഇനത്തില്‍ ആദ്യവര്‍ഷം 7500 കോടി രൂപ സമാഹരിക്കാന്‍ കഴിയുമെന്ന് സര്‍ക്കാര്‍ കണക്കുകൂട്ടുന്നത്. നാലുവര്‍ഷം കൊണ്ട് 43000 രൂപ ഇതുവഴി സമാഹരിക്കാനാകും. ഇലക്ട്രിക് വാഹനങ്ങള്‍ പ്രോത്സാഹിപ്പിക്കാന്‍ തുടക്കത്തില്‍ ഇത്തരം വാഹനങ്ങള്‍ക്ക് 50,000 രൂപ ഇളവ് അനുവദിക്കും. നാലാമത്തെ വര്‍ഷമാകുമ്പോള്‍ ഇളവ് 15000 രൂപയായി കുറച്ചുകൊണ്ടുവരാനാണ് സര്‍ക്കാര്‍ ഉദ്ദേശിക്കുന്നത്. 

ഇലക്ട്രിക് വാഹനങ്ങള്‍ വാങ്ങുന്നത് പ്രോത്സാഹിപ്പിക്കാന്‍ നേരിട്ട് ആനുകൂല്യം കൈമാറുന്നതിന്റെ സാധ്യതയും കേന്ദ്രം പരിശോധിക്കുന്നത്. ഇതിന്റെ ഭാഗമായി ഇലക്ട്രിക് വാഹനങ്ങള്‍ വാങ്ങുന്നത് പ്രോത്സാഹിപ്പിക്കാന്‍ കേന്ദ്രസര്‍ക്കാരിന്റെ ഉപദേശക സമിതിയായ നീതി ആയോഗ് വിദഗ്ധരുമായി കൂടിയാലോചന നടത്തി വരികയാണ്. ഇലക്ട്രിക് വാഹനങ്ങള്‍ വാങ്ങുന്നവര്‍ക്ക് ആദ്യവര്‍ഷം 25000 രൂപ മുതല്‍ 50000 രൂപ വരെ ഇളവ് അനുവദിക്കുന്നതിന്റെ സാധ്യതയാണ് നീതി ആയോഗ് തേടുന്നത്. ഇലക്ട്രിക് വിഭാഗത്തില്‍പ്പെടുന്ന ഇരുചക്ര, മുചക്ര, കാറുകള്‍ക്ക് ആനുകൂല്യം കൈമാറാനാണ് ആലോചന നടക്കുന്നത്.

സംസ്ഥാനങ്ങളില്‍ സര്‍ക്കാര്‍ ഏജന്‍സികളുടെ നിയന്ത്രണത്തില്‍ ഓടുന്ന ഇലക്ട്രിക് ബസുകള്‍ക്ക് കിലോമീറ്റര്‍ അടിസ്ഥാനത്തില്‍ ആനുകൂല്യങ്ങള്‍ പ്രഖ്യാപിക്കാനും പദ്ധതിയുണ്ട്. ഇലക്ട്രിക് വാഹനങ്ങള്‍ നിര്‍മ്മിക്കുന്ന കമ്പനികള്‍ക്ക് ആനുകൂല്യങ്ങള്‍ കൈമാറുന്ന രീതിക്ക് പകരം വാഹന ഉടമകള്‍ക്ക് നേരിട്ട് പ്രയോജനം ചെയ്യുന്ന പദ്ധതി ആവിഷ്‌കരിക്കാന്‍ കേന്ദ്ര സര്‍ക്കാര്‍ നിര്‍ദേശിച്ചിരുന്നു. ബാറ്ററി വാങ്ങുന്നതിന് ഇളവ് അനുവദിക്കുന്നത് അടക്കമുളള കാര്യങ്ങള്‍ പരിശോധിക്കാനാണ് നിര്‍ദേശം. പരിഷ്‌കരിച്ച ഇലക്ട്രിക് വാഹനനയം അംഗീകാരത്തിനായി കേന്ദ്രസര്‍ക്കാരിന്റെ പരിഗണനയിലാണ്.