ഇനി പ്രേക്ഷകര്ക്ക് ഇഷ്ടപ്പെട്ട ചാനല് തെരഞ്ഞെടുക്കാം; പുതിയ നിയമം പ്രാബല്യത്തില്
പ്രേക്ഷകര്ക്ക് ഇഷ്ടപ്പെട്ട ചാനലുകള് തെരഞ്ഞെടുക്കാമെന്ന ട്രായ് (ടെലികോം റെഗുലേറ്ററി അഥോറിറ്റി ഓഫ് ഇന്ത്യ) നിര്ദേശം പ്രാബല്യത്തില്. എന്നാല്, പുതിയ നിബന്ധനകള് നടപ്പാക്കാന് രാജ്യത്തെ ചാനല് വിതരണക്കാരും വരിക്കാരും സജ്ജമാകാത്തതിനാല് ഇഷ്ടപ്പെട്ട ചാനലുകള് തെരഞ്ഞെടുക്കാന് ഒരു മാസം സാവകാശം അനുവദിച്ചു. ജനുവരി 31 വരെ തല്സ്ഥിതി തുടരാനാണ് ട്രായ് നല്കിയിരിക്കുന്ന നിര്ദേശം.
പുതിയ നിബന്ധനകളിലുള്ള അവ്യക്തതയാണ് കാലാവധി നീട്ടാന് ട്രായിയെ പ്രേരിപ്പിച്ചത്. രാജ്യവ്യാപകമായി ഓപ്പറേറ്റര്മാര്ക്കും ഉപയോക്താക്കള്ക്കും ഇതേക്കുറിച്ചു വ്യക്തത വന്നിട്ടില്ല. ഇതുകൂടാതെ ഡിസംബര് 29 മുതല് കേബിള് ടിവി ബഹിഷ്കരിക്കും എന്ന ആഹ്വാനത്തോടെ വ്യാപകമായി സന്ദേശങ്ങള് പ്രചരിച്ചതും തീരുമാനത്തിന് പിന്നിലുണ്ട്.
ഉപയോക്താക്കള് അവര്ക്കാവശ്യമുള്ള പേ ചാനലുകള്ക്ക് മാത്രം പണം നല്കിയാല് മതിയെന്നതാണ് പുതിയ രീതിയുടെ മേന്മയായി ട്രായി ചൂണ്ടിക്കാട്ടുന്നത്. എന്നാല് ചാനലുകാരുടെ ആക്ഷേപം അവരുടെ ജനപ്രിയമല്ലാത്ത ചാനലുകള്ക്ക് വരുമാനം ഉണ്ടാകില്ലെന്നാണ്. കേബിള്, ഡിടിഎച്ച് ഓപ്പറേറ്റര്മാര്ക്കും തങ്ങളുടെ വരുമാന വിഹിതം കുറയുമെന്നാണ് ആശങ്ക. അതുകൊണ്ടുതന്നെ ഇനിയൊരു നിര്ദേശം വരുന്നതുവരെ നിലവിലുള്ള പേ ചാനലുകള് പിന്വലിക്കരുതെന്ന് ട്രായി നിര്ദേശിച്ചിട്ടുണ്ട്. ഒപ്പം വരിക്കാര് ഇഷ്ടപ്പെട്ട ചാനല് തെരഞ്ഞെടുത്താലും തത്കാലത്തേക്ക് പേ ചാനലുകള് ബ്ലാക്കൗട്ട് ചെയ്യാനും പാടില്ല.
പേ ചാനലുകള് ഉപയോഗിക്കുന്നത് കുറച്ചു കാലത്തേക്കെങ്കിലും ഒഴിവാക്കണമെന്ന ആഹ്വാനം ഫേസ്ബുക്ക്, യുട്യൂബ്, വാട്സ്ആപ് മുതലായ സോഷ്യല് മീഡിയ പ്ലാറ്റ്ഫോമുകളിലൂടെ ഉയരുന്നുണ്ട്. പ്രേക്ഷകര് പേ ചാനലുകള് കാണാതിരുന്നാല് ചാനല് അധികൃതര് പേ ചാനലുകളെ സൗജന്യ ചാനലുകളാക്കി പ്രേക്ഷകര്ക്ക് മുന്നിലെത്തിക്കുമെന്നാണ് ഇത്തരം സന്ദേശങ്ങളില് പറയുന്നത്.
https://www.facebook.com/Malayalivartha