റോക്കറ്റ് പോലെ കുതിച്ചുയർന്ന സ്വർണവില ഒക്ടോബറിന് ശേഷം താഴേക്ക് പോകാൻ തുടങ്ങി. തുടർച്ചയായ ആറാം ദിവസമാണ് സ്വർണ വില കുറയുന്നത്. എംസിഎക്‌സിന്റെ സ്വർണ്ണ ഫ്യൂച്ചർ വില 10 ഗ്രാമിന് 0.05 ശതമാനം കുറഞ്ഞ് 37,551 രൂപയിലെത്തി നിൽക്കുകയാണ് . കഴിഞ്ഞ ആറ് ദിവസത്തിനുള്ളിൽ സ്വർണ വില ഗ്രാമിന് 800 രൂപയാണ് കുറഞ്ഞിരിക്കുന്നത്. മൂന്നു മാസത്തിനുള്ളിൽ 10 ഗ്രാമിന് 2,450 രൂപ കുറഞ്ഞു. സെപ്റ്റംബറിൽ സ്വർണ വില റെക്കോർഡ് വിലയായ 10 ഗ്രാമിന് 40,000 രൂപ വരെ എത്തിയിരുന്നു

വെള്ളിയുടെ വിലയിലും ഇന്ന് കുറവുണ്ട് . എം‌സി‌എക്‌സിൽ സിൽവർ ഫ്യൂച്ചറുകൾ 0.09 ശതമാനം ഇടിഞ്ഞ് കിലോയ്ക്ക് 43,469 രൂപയിലെത്തി. ഇന്നലെ എം‌സി‌എക്‌സിൽ വെള്ളി നിരക്ക് 0.09 ശതമാനം കുറഞ്ഞ് കിലോയ്ക്ക് 43,465 രൂപയിലെത്തിയിരുന്നു

പവന് 28,040 രൂപയിലും ഗ്രാമിന് 3,505 രൂപയിലുമാണ് കേരളത്തിൽ ഇന്ന് വ്യാപാരം നടക്കുന്നത്. ഇന്നലെയും ഇതേ വിലയ്ക്ക് തന്നെയാണ് വ്യാപാരം നടന്നിരുന്നത്. ഒക്ടോബറിന് ശേഷമുള്ള ഏറ്റവും കുറഞ്ഞ വിലയാണ് ഇന്ന് രേഖപ്പെടുത്തിയിരിക്കുന്നത്. ഡിസംബറിലെ ഏറ്റവും ഉയർന്ന വില 28640 രൂപയാണ്. ഡിസംബർ നാലിനാണ് ഈ വിലയ്ക്ക് വ്യാപാരം നടന്നത്

ആഗോള വിപണിയിൽ സ്വർണ വില ഔൺസിന് 1,463.59 ഡോളറാണ്. യുഎസ് ഫെഡറൽ നിരക്ക് പ്രഖ്യാപനത്തിന് മുന്നോടിയായാണ് വിലകൾ കുറഞ്ഞത്. വെള്ളി ഔൺസിന് 0.1 ശതമാനം ഇടിഞ്ഞ് 16.63 ഡോളറിലെത്തി. ഡോളറിനെതിരെ ഇന്ത്യൻ രൂപ ഉയർന്നതിനെ തുടർന്ന് ഇന്ത്യയിലെ സ്വർണ്ണ വില കുറഞ്ഞു

ആഗോള വിപണിയിൽ ഈ വർഷം ഇതുവരെ സ്വർണത്തിന്റെ വില 14% ആണ് ഉയർന്നിരിക്കുന്നത്. ഇന്ത്യയിൽ ഈ വർഷം സ്വർണ വിലകൾ 19% ഉയർന്നു. ആഗോള ശരാശരിയേക്കാൾ കൂടുതലാണിത്. എന്നാൽ ഇപ്പോൾ ഇന്ത്യയിൽ സ്വർണ വിലയിൽ തുടർച്ചയായ ഇടിവുണ്ടായിട്ടും സ്വർണ്ണത്തിന് ആവശ്യക്കാരില്ലെന്ന് റോയിട്ടേഴ്സ് കഴിഞ്ഞ ദിവസം റിപ്പോർട്ട് ചെയ്തിരുന്നു.