ഇനി ഇതര സംസ്ഥാന തൊഴിലാളികള്‍ക്കും കേരളത്തിലെ റേഷന്‍ കടകളില്‍ നിന്നും ഭക്ഷ്യധാന്യങ്ങള് വാങ്ങാം
രാജ്യത്തെ റേഷന്‍ കാര്‍ഡ് ഉടമകള്‍ക്ക് ഏത് റേഷന്‍ കടയില്‍ നിന്നും ഭക്ഷ്യധാന്യങ്ങള് വാങ്ങാനാകുന്ന പദ്ധതി കേരളത്തിലും നടപ്പാക്കുന്നു. റേഷന്‍ കടയുടമകള്‍ക്ക് കടിഞ്ഞാണിടുന്നതിന്റെ ഭാഗമാണ് കേന്ദ്രസര്‍ക്കാരിന്റെ പുതിയ നീക്കം. പദ്ധതി ഈ വര്‍ഷം ആരംഭിക്കാനാണ് കേന്ദ്ര തീരുമാനം. സംസ്ഥാനത്ത് ഏതു റേഷന്‍ കടയില്‍ നിന്നും ഭക്ഷ്യധാന്യങ്ങള് വാങ്ങാനാകുന്ന പോര്‍ട്ടബിലിറ്റി സംവിധാനം ഇപ്പോഴുണ്ട്. ഇതു രാജ്യമാകെ വ്യാപിപ്പിക്കും. ഇതിനായി കേന്ദ്രത്തിന്റെ ഇന്റഗ്രേറ്റഡ് മാനേജ്മെന്റ് ഓഫ് പബ്ലിക് ഡിസ്ട്രിബ്യൂഷന്‍ സിസ്റ്റം (ഐ എം പി ഡി എസ്) നടപ്പാക്കാന്‍ സംസ്ഥാനത്ത് ഒരുക്കം തുടങ്ങി.
പോര്‍ട്ടബിലിറ്റി സംവിധാനം വ്യാപകമാകുന്നതോടെ കേരളം പോലെയുള്ള സംസ്ഥാനങ്ങളിലെ ഇതരസംസ്ഥാന തൊഴിലാളികള്‍ക്ക് റേഷന്‍ കടകളില്‍നിന്നും ധാന്യങ്ങള്‍ ലഭിച്ചുതുടങ്ങുന്നതോടെ, റേഷന്‍ കടകളും കൂടുതല്‍ സജീവമാകും. സംസ്ഥാനാതിര്‍ത്തികളില്‍ താമസിക്കുന്നവര്‍ക്ക് രണ്ട് സംസ്ഥാനത്തും റേഷന്‍ കാര്‍ഡ് ഉള്ളവരുണ്ട്. ഐ എം പി ഡി എസ് നടപ്പാകുന്നതോടെ ഒരു റേഷന്‍ കടയില്‍ നിന്ന് ധാന്യങ്ങള്‍ വാങ്ങുന്നവര്‍ക്ക് രാജ്യത്തെ മറ്റൊരിടത്ത് നിന്നും റേഷന്‍ സാധനം ലഭിക്കില്ല. ഇതോടെ രണ്ടാമത്തെ കാര്‍ഡ് സ്വാഭാവികമായും ഇല്ലാതാകും.
തൊഴില്‍ തേടി ഇതര സംസ്ഥാനങ്ങളിലേക്ക് പോകുന്നവരുടെ ഭക്ഷ്യധാന്യങ്ങള് റേഷന്‍ കട ഉടമകള്‍ കൈക്കലാക്കുന്നത് പതിവാണ്. തൊഴില്‍ ചെയ്യുന്ന സംസ്ഥാനത്ത് ഇവര്‍ക്ക് റേഷന്‍ ലഭ്യമാകുന്നതോടെ ഈ പ്രശ്‌നത്തിന് പുതിയ സംവിധാനം പരിഹാരമാകും.
സംസ്ഥാനത്തെ 86 ലക്ഷം കാര്‍ഡ് ഉടമകളില്‍ 15 % ഭക്ഷ്യധാന്യങ്ങള് വാങ്ങുന്നില്ല. തുടര്‍ച്ചയായി റേഷന്‍ വാങ്ങാത്തവര്‍ക്ക് ഭാവിയില്‍ ഭക്ഷ്യധാന്യം നല്‍കില്ലെന്ന തീരുമാനം ഉടന്‍ നടപ്പാക്കണമെന്നും കേന്ദ്രം കേരളത്തോട് ആവശ്യപ്പെട്ടു. 3 മാസം വരെ ഭക്ഷ്യധാന്യം വാങ്ങാത്തവരെ ഒഴിവാക്കാന്‍ തീരുമാനിച്ചെങ്കിലും ഇതുവരെ ഉത്തരവായിട്ടില്ല. ഇവരില്‍ ഏറെയും അന്ത്യോദയ അന്നയോജന (എ എ വൈ), മുന്‍ഗണന വിഭാഗക്കാരാണ്.
https://www.facebook.com/Malayalivartha
