മോഷണം തടയാന്‍ ലക്ഷ്യമിട്ട് കേന്ദ്ര സര്‍ക്കാര്‍ കഴിഞ്ഞ ഏപ്രില്‍ 1 മുതല്‍ നിര്‍ബന്ധമാക്കിയ അതീവ സുരക്ഷ നമ്പര്‍പ്ലേറ്റുകള്‍ ഘടിപ്പിക്കാത്ത വാഹനങ്ങള്‍ വരുന്ന 28 മുതല്‍ സംസ്ഥാനത്ത് രജിസ്റ്റര്‍ ചെയ്യില്ലെന്ന് മോട്ടോര്‍ വാഹന വകുപ്പ്. കഴിഞ്ഞ ഏപ്രിലിന് ശേഷം ഇത്തരം നമ്പര്‍ പ്ലേറ്റ് ഘടിപ്പിക്കാത്ത 1.20 ലക്ഷം വാഹനങ്ങളില്‍ ഇത് നടപ്പാക്കി രജിസ്‌ട്രേഷന്‍ സര്‍ട്ടിഫിക്കറ്റ് 27ന് ഉള്ളില്‍ കൈപ്പറ്റണമെന്ന് ഡീലര്‍മാര്‍ക്ക് കര്‍ശന നിര്‍ദ്ദേശവും നല്‍കി.

നമ്പര്‍ പ്ലേറ്റുകളിലുള്ള സ്ഥിര നമ്പര്‍ ആര്‍ സി ബുക്കില്‍ രേഖപ്പെടുത്തേണ്ടതുണ്ട്. ഇതു ലഭ്യമാകാത്തത് കാരണം ഇവയ്ക്ക് ആര്‍ സി ബുക്കും നല്‍കിയിട്ടില്ല. വ്യാഴാഴ്ചയ്ക്കകം സുരക്ഷ നമ്പര്‍പ്ലേറ്റുകള്‍ ഘടിപ്പിച്ച് ആര്‍ സി ബുക്ക് കൈപ്പറ്റാത്ത ഡീലര്‍മാരുടെ വാഹനങ്ങള്‍ ഇനി മുതല്‍ രജിസ്റ്റര്‍ ചെയ്തു നല്‍കില്ല. 

ഹോളോഗ്രാം സ്റ്റിക്കറും ലേസര്‍ കൊണ്ട് പതിപ്പിച്ച സ്ഥിര നമ്പരും ഉള്ള നമ്പര്‍പ്ലേറ്റുകള്‍ ഇളക്കി മാറ്റാനാവില്ല. വാഹനനിര്‍മ്മാതാക്കളോ ഡീലര്‍മാരോ നമ്പര്‍ പ്ലേറ്റ് തയ്യാറാക്കി ഉടമയ്ക്ക് സൗജന്യമായി നല്‍കണം എന്നാണ് ചട്ടം. എന്നാല്‍ കഴിഞ്ഞ 3 മാസത്തിനിടെ വിറ്റഴിച്ചതില്‍ 1.20 ലക്ഷം വാഹനങ്ങള്‍ക്ക് ഇത്തരം നമ്പര്‍പ്ലേറ്റ് ഘടിപ്പിച്ചിട്ടില്ല. കേന്ദ്രസര്‍ക്കാരിന്റ ഉത്തരവിറങ്ങി 3 മാസം കഴി!ഞ്ഞിട്ടും സംസ്ഥാനത്ത് ഇത് നിര്‍ബന്ധമാക്കാന്‍ വൈകുന്നത് മോട്ടോര്‍ വാഹന വകുപ്പിന്റെ പ്രതിച്ഛായയെ ബാധിക്കുമെന്നും വിട്ടുവീഴ്ച ചെയ്യേണ്ടന്നുമാണ് ഗതാഗത കമ്മീഷണര്‍ ആര്‍ ടി ഒമാര്‍ക്ക് നല്‍കിയിരിക്കുന്ന നിര്‍ദേശം.