ആരാധകരെ വീണ്ടും അമ്പരപ്പിച്ച് ഫഹദ്. താരത്തിന്റേതായി ഒരുങ്ങുന്ന പുതിയ ചിത്രമായ മാലിക്കിനു വേണ്ടി 15 കിലോ ഭാരം കുറച്ചാണ് താരം ആരാധകരെ ഞെട്ടിച്ചത്. ചിത്രത്തിലെ ലൊക്കേഷൻ ചിത്രങ്ങൾ സമൂഹ മാധ്യമങ്ങളിൽ തരംഗമായിരിക്കുകയാണ്.ഒരു തീരപ്രദേശത്തെ ന്യൂനപക്ഷ വിഭാഗത്തിന്റെ നേതാവായ സുലൈമാൻ എന്ന കഥാപാത്രത്തെയാണ് ഫഹദ് ഫാസിൽ അവതരിപ്പിക്കുന്നത്. വിവിധ കാലഘട്ടങ്ങളിലൂടെ സഞ്ചരിക്കുന്ന മാലിക്കിൽ നാല് വ്യത്യസ്ത രൂപങ്ങൾ താരം അവതരിപ്പിക്കുമെന്ന് പ്രതീക്ഷിക്കുന്നു. 20 വയസുകാരനെ മുതൽ 57 വയസുകാരനെ വരെ നടൻ ചിത്രത്തിൽ അവതരിപ്പിക്കുന്നു. 27 കോടി രൂപയാണ് ചിത്രത്തിന്റെ ബജറ്റ്.

നിമിഷ സജയൻ, ജോജു ജോർജ്, വിനയ് ഫോർട്ട്, ദിലേഷ് പോത്തൻ, അപ്പാനി ശരത്, ചന്തുനാഥ് എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.സിനിമയുടെ സ്റ്റണ്ട് സീക്വൻസുകൾ കൈകാര്യം ചെയ്യുന്നത് ജുറാസിക് പാർക്ക്, ഫാസ്റ്റ് ആൻഡ് ഫ്യൂരിയസ് 5 ഫെയിം ആക്ഷൻ കൊറിയോഗ്രാഫർ. ലീ വിറ്റേക്കർ ആണ്.പാട്ടുകളും പശ്ചാത്തല സംഗീതവും ഒരുക്കുന്നത് സുഷിൻ ശ്യാം ആണ്.ഫഹദ് ഫാസിലിന്റെ കരിയറിലെ ഏറ്റവും വലിയ പ്രോജക്ടായ മാലിക്, ആന്റോ ജോസഫ് ഫിലിം കമ്പനി ബാനറിൽ ആന്റോ ജോസഫ് ആണ് നിർമ്മിക്കുന്നത്.