മലയാളത്തിലെ എക്കാലത്തെയും ഇതിഹാസ ഗായകനാണ് കെ ജെ യേശുദാസ്. മലയാളികൾക്ക് എന്നും അഭിമാനിക്കാവുന്ന ലോകാത്ഭുതം. സംഗീതത്തിന്റെ തന്നെ പര്യായമെന്നു വിശേഷിപ്പിക്കാവുന്ന ഗാന ഗന്ധർവന് ഇന്ന് 80 ന്റെ നിറവിലാണ്. ലോകം മുഴുവൻ സംഗീത പ്രതിഭയ്ക്ക് ആശംസകൾ നേരുകയാണ്.50,000 ത്തിലധികം ഗാനങ്ങൾ ഇതിനോടകം ആലപിച്ച  ഈ സംഗീതജ്ഞൻ നിരവധി പ്രാദേശിക ഭാഷാ ഗാനങ്ങൾക്കും ശബ്ദം നൽകിയിട്ടുണ്ട്, കൂടാതെ ഇന്ത്യൻ സിനിമാ ചരിത്രത്തിലെ ഏറ്റവും മികച്ച പിന്നണി ഗായകരിൽ ഒരാളാണ്  യേശുദാസ്.തന്റെ മധുരമായ ശബ്ദത്തിലൂടെ സംഗീതപ്രേമികളെ ആകർഷിക്കുന്ന ഇതിഹാസം ഇന്നും തന്റെ കഴിവുകൾ മെച്ചപ്പെടുത്തുന്നതിനായി പതിവായി പരിശീലിക്കുന്നു.

എട്ട് ദേശീയ അവാർഡുകൾ ഉൾപ്പെടുന്ന നിരവധി അംഗീകാരങ്ങൾ ഈ സംഗീത പ്രതിഭ സ്വന്തമാക്കിയിട്ടുണ്ട്.'ദാസെട്ടൻ' എന്ന് വിശേഷിപ്പിക്കപ്പെടുന്ന അദ്ദേഹം അഞ്ച് പതിറ്റാണ്ടായി തന്റെ ഗാന വിസ്മയം തുടരുകയാണ്. മലയാളത്തിലെ അനവധി പ്രമുഖർ ദാസേട്ടന് ആശംസകളുമായി എത്തിയിരിക്കുകയാണ്. പ്രമുഖ ഗായകരായ ചിത്ര, സുജാത, നടന്മാരായ ഗിന്നസ് പക്രു, ഉണ്ണി മുകുന്ദൻ എന്നിവരും സമൂഹ മാധ്യമങ്ങളിലൂടെ ആശംസകൾ നേർന്നു കഴിഞ്ഞു. ദാസേട്ടൻ ആരോഗ്യത്തോടെ ഇരിക്കട്ടെ എന്നാണ് ഏവരും ആശംസകൾ നേർന്നത്.