2019ൽ പ്രേക്ഷകർ ഹൃദയത്തോട് ചേർത്ത ചിത്രങ്ങളിൽ ഒന്നായിരുന്നു അൻഡ്രോയ്ഡ് കുഞ്ഞപ്പൻ. മലയാളി പ്രേക്ഷകരെ ഏറ്റവും കൂടുതൽ രസിപ്പിച്ച ചിത്രമായിരുന്നു നവാഗതനായ രതീഷ് ബാലകൃഷ്ണൻ പൊതുവാൾ സംവിധാനം ചെയ്ത ആൻഡ്രോയ്ഡ് കുഞ്ഞപ്പൻ.സിനിമയിലെ റോബോ കുഞ്ഞപ്പനായിരുന്നു പ്രേക്ഷകരെ ഏറ്റവും അതിശയിപ്പിച്ചത്. ആരാണീ റോബോർ‌ട്ട്?, സിനിമയ്ക്ക് വേണ്ടി എവിടുന്നാണ് റോബോട്ടിനെ ഇറക്കുമതി ചെയ്തത്?, ആരാണിതിനെ നിർമ്മിച്ചത് തുടങ്ങി നിരവധി സംശയങ്ങൾ സിനിമ കണ്ടിറങ്ങിയ ഓരോ പ്രേക്ഷകന്റെയും ഉള്ളിൽ ഉണ്ടായിരുന്നു . ഈ സംശങ്ങൾക്കെല്ലാമുള്ള മറുപടിയുമായി അണിയറ പ്രവർത്തകർ എത്തിയിരിക്കുകയാണ് ആരെയും അമ്പരപ്പിക്കുന്ന വെളിപ്പെടുത്തലാണ് അണിയറപ്രവർത്തകർ പുറത്തുവിട്ടത്.

മിനിസ്ക്രീലെ കോമഡി പരിപാടികളിലൂടെയും വിരളിലെണ്ണാവുന്ന ചിത്രങ്ങളിലും അഭിനയിച്ച് മലയാളി പ്രേക്ഷകരെ പൊട്ടിച്ചിരിപ്പിച്ച സൂരജ് തേലക്കാടാണ് ചിത്രത്തിൽ ആൻഡ്രോയ്ഡ് കുഞ്ഞപ്പനായി വേഷമിട്ടത്. സ്വന്തം മുഖം കാണിക്കാതെ ഒരു ‍‍ടൈറ്റിൽ കഥാപാത്രത്തെ അവതരിപ്പിച്ച് സിനിമ ഹിറ്റാക്കിയ സന്തോഷത്തിലാണ് സൂരജ് ഇപ്പോൾ. അതേസമയം, സിനിമയുടെ ആസ്വാദനത്തിന് തടസ്സമാകേണ്ടാന്ന് കരുതിയാണ് ഈ വിവരം ഇതുവരെ പുറത്തുവിടാതിരുന്നതെന്നു സിനിമയുടെ സംവിധായകൻ അടുത്തിടെ ഒരു അഭിമുഖത്തിൽ പറഞ്ഞു. കുഞ്ഞപ്പന്റെ രണ്ടാംഭാ​ഗം ഒരുക്കാൻ പദ്ധതിയുണ്ടെന്നും എന്നാൽ അതുടനെ ഉണ്ടാകില്ലെന്നും അദ്ദേഹം വെളിപ്പെടുത്തി. റോബൊക്കുള്ളിൽ യഥാർത്ഥ മനുഷ്യനുണ്ടായിരുന്നു എന്ന വെളിപ്പെടുത്തൽ പ്രേക്ഷകരെ ഒന്നടങ്കം അമ്പരപ്പിച്ചിരിക്കുകയാണ്. പ്രേക്ഷകർ നെഞ്ചോട് ചേർത്ത കഥാപാത്രവും ചിത്രലെ കുഞ്ഞൻ റോബോട്ട് തന്നെയായിരുന്നു.