തീരപ്രദേശ നിയമം ലംഘിച്ചുകൊണ്ട് നിര്‍മ്മിച്ചിരുന്ന ഹോളിഫെയ്ത്ത് എച്ച് 2 ഒ, ആല്‍ഫാ സെറീന്‍, ജെയ്ന്‍ കോറല്‍കോവ്, ഗോള്‍ഡന്‍ കായലോരം എന്നീ ഫ്ലാറ്റുകൾ നിയന്ത്രിത സ്ഫോടനത്തിൽ തകർന്നുകഴിഞ്ഞു.. സ്‌ഫോടനത്തെ അനുകൂലിച്ചും പ്രതികൂലിച്ചും സോഷ്യൽ മീഡിയകളിൽ വാർത്തകൾ നിറയുമ്പോൾ എച്ച് 2 ഒ ഫ്ലാറ്റിലെ താമസക്കാരനായിരുന്ന സംവിധായകനും നടനുമായ മേജർ രവി മാധ്യമങ്ങളോട് പറഞ്ഞ വാക്കുകള്‍ ശ്രദ്ധ നേടിയിരിക്കുകയാണ്.

എച്ച് ടു ഒ ഫ്‌ളാറ്റിന്‍റെ ടെറസില്‍ വെച്ചായിരുന്നു കര്‍മയോദ്ധയിലെ മോഹന്‍ലാലിന്‍റെ ആദ്യ ഷോട്ട് താൻ എടുത്തതെന്നാണ് അദ്ദേഹം പറഞ്ഞത് . 2012-ലാണ് മേജർ രവി മോഹൻലാലിനെ നായകനാക്കി കര്‍മ്മയോദ്ധ എന്ന പടമെടുത്തത്

ഫ്ളാറ്റ് പൊളിച്ചുനീക്കുന്നതിനേക്കാള്‍ ഏറെ വിഷമിപ്പിച്ചത് അത് മൂലം മറ്റുള്ളവര്‍ക്കുണ്ടാവുന്ന ബുദ്ധിമുട്ടുകളാണ്. പൊളിക്കും മുമ്പ് ഫ്ളാറ്റിനു മുന്നില്‍ വന്നുനിന്നപ്പോഴും മനസിലുണ്ടായിരുന്നത് മറ്റുള്ളവര്‍ക്ക് ആപത്തൊന്നുംവരുത്തരുതേ എന്നു മാത്രമായിരുന്നു ... .ഫ്ലാറ്റിന്‍റെ സമീപവാസികള്‍ക്കും മറ്റുള്ളവര്‍ക്കും യാതൊരു നാശനഷ്ടമുണ്ടാക്കാതെ പദ്ധതി പൂര്‍ത്തിയാക്കാന്‍ കഴിഞ്ഞതില്‍ ഫ്ലാറ്റ് പൊളിക്കല്‍ ഏറ്റെടുത്ത എന്‍ജിനീയര്‍മാരോടും തന്‍റെ നന്ദി അറിയിക്കുന്നതായും അദ്ദേഹം പറഞ്ഞിരിക്കുകയാണ്.

കഴിഞ്ഞ 10 വര്‍ഷക്കാലം തങ്ങളെല്ലാവരും ഒരു കുടുംബം പോലെ ഒന്നിച്ചു താമസിച്ച സ്ഥലമായിരുന്നു ഇതെന്നും എന്തുവന്നാലും തങ്ങള്‍ അവസാനം വരെ ഒന്നിച്ചു നില്‍ക്കുമെന്നും അദ്ദേഹം പറഞ്ഞു. ഞങ്ങള്‍ വഞ്ചിക്കപ്പെടുകയായിരുന്നുവെന്ന് തിരിച്ചറിഞ്ഞത് അവസാനമാണ്. എങ്കിലും ഈ മണ്ണ് ഞങ്ങളുടേതാണ്. എന്നെങ്കിലും ഇവിടെത്തന്നെ തിരിച്ചുവരുമെന്നൊരു ഉറപ്പുണ്ടെന്നും അദ്ദേഹം കൂട്ടിച്ചേര്‍ത്തു .