നരച്ച മുടിയിഴകളും കുഴിഞ്ഞ കണ്ണുകളുമായി അമ്പരപ്പിക്കുന്ന മേക്ക് ഓവറിൽ ഫഹദ് ഫാസിൽ; പുതിയ ചിത്രം മാലിക്കിന്റെ പോസ്റ്റർ പുറത്തിറങ്ങി
നടൻ ഫഹദ് ഫാസിലിന്റേതായി അണിയറയില് ഒരുങ്ങുന്ന എറ്റവും പുതിയ ചിത്രമായ മാലിക്കിന്റെ ഫസ്റ്റ് ലുക്ക് പോസ്റ്റര് പുറത്തുവന്നു . താര രാജാക്കന്മാരായ മോഹന്ലാലും മമ്മൂട്ടിയും ചേര്ന്നാണ് ചിത്രത്തിന്റെ പോസ്റ്റർ പുറത്തുവിട്ടിരിക്കുന്നത്. ഇരുവരുടേയും ഫേസ്ബുക്ക് പേജിലൂടെയാണ് പോസ്റ്റർ പ്രേക്ഷകർക്ക് പങ്കുവെച്ചത്. സൂപ്പർ ഹിറ്റ് ചിത്രം ടേക്ക് ഓഫിന് ശേഷം മഹേഷ് നാരായണന് സംവിധാനം ചെയ്യുന്ന ചിത്രമാണ് മാലിക്. നരച്ച മുടിയിഴകളും കുഴിഞ്ഞ കണ്ണുകളുമായുള്ള ഫഹദിന്റെ മേക്ക് ഓവര് ലുക്കാണ് പോസ്റ്ററില് കാണുന്നത്. ഫഹദ് ഫാസിലിന്റെ കരിയറിലെ എറ്റവും വലിയ ചിത്രമായിട്ടാണ് മാലിക്ക് എത്തുന്നത് .
ബിഗ് ബഡ്ജറ്റില് ഒരുക്കുന്ന ചിത്രം ആന്റോ ജോസഫാണ് നിര്മ്മിക്കുന്നത്. ചിത്രത്തിന്റെ പ്രധാന ലൊക്കേഷനുകളിലൊന്ന് ലക്ഷദ്വീപ് ആണ്. മാലിക്കില് വേറിട്ട ഗെറ്റപ്പുകളിലാണ് ഫഹദ് അഭിനയിക്കുന്നത് . നിമിഷ സജയന് നായികയാവുന്ന ചിത്രത്തില് ജോജു ജോര്ജ്ജ്, വിനയ് ഫോര്ട്ട്, ദിലീഷ് പോത്തന്, ജലജ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. മാലികിന് വേണ്ടി 15 കിലോ ശരീരഭാരം ആണ് ഫഹദ് കുറച്ചത് . പൊളിറ്റിക്കല് ത്രില്ലർ സിനിമ അണിയറയില് ഒരുങ്ങിക്കൊണ്ടിരിക്കുകയാണ്. മാലികിന്റെതായി നേരത്തെ പുറത്തിറങ്ങിയ ലൊക്കഷന് ചിത്രങ്ങള് തരംഗമായി മാറിയിരുന്നു.
ഹോളിവുഡ് ആക്ഷന് കൊറിയോഗ്രാഫര് ലീ വിറ്റാക്കര് ആണ് ഫഹദ് ചിത്രത്തിന് സംഘട്ടന രംഗങ്ങള് തയ്യാറാക്കുന്നത്. സനു ജോണ് വര്ഗീസ് ഛായാഗ്രഹണം നിര്വ്വഹിക്കുന്ന ചിത്രത്തിന് സുശിന് ശ്യാമാണ് സംഗീതസംവിധാനം നിർവ്വഹിക്കുന്നത്. വിഷ്ണു ഗോവിന്ദ്-ശ്രീ ശങ്കര് എന്നിവരാണ് ശബ്ദമിശ്രണം. സന്തോഷ് രാമന് പ്രൊഡക്ഷന് ഡിസൈനിംഗും മഹേഷ് നാരായണന് എഡിറ്റിങ്ങും നിർവഹിക്കുന്നു.
https://www.facebook.com/Malayalivartha