പ്രേക്ഷകര്‍ക്ക് ഏറെ പ്രിയപ്പെട്ട താരമാണ് പൃഥ്വിരാജ്. താരത്തിന്റെ പുതിയ ലുക്കിനെക്കുറിച്ചുള്ള ചര്‍ച്ചകള്‍ സോഷ്യല്‍ മീഡിയയില്‍ സജീവമാണ്. ബ്ലസി സംവിധാനം ചെയ്യുന്ന ആടുജീവിതം എന്ന ചിത്രത്തിന് വേണ്ടിയാണ് താരം മെലിയുന്നത്. പരമാവധി മെലിയാനുള്ള ശ്രമത്തിലാണ് താനെന്ന് താരം മുൻപ് വെളിപ്പെടുത്തിയിരുന്നു . കട്ടത്താടിയില്‍ മെലിഞ്ഞ രൂപത്തിലുള്ള പൃഥ്വിരാജിന്റെ പുതിയ ചിത്രങ്ങളും വീഡിയോയും വൈറലായി മാറിക്കൊണ്ടിരിക്കുകയാണ്. ലിസ്റ്റിന്‍ സ്റ്റീഫന്റെ മകളുടെ മാമോദീസയായിരുന്നു കഴിഞ്ഞ ദിവസം. സിനിമാലോകത്തുനിന്നും നിരവധി പേരായിരുന്നു ചടങ്ങില്‍ പങ്കെടുക്കാനായി എത്തിയത്. ഭാര്യ സുപ്രിയയ്‌ക്കൊപ്പം പൃഥ്വിയും ചടങ്ങിൽ എത്തിയിരുന്നു.

മെലിയുന്നുവെന്ന് പറഞ്ഞിരുന്നുവെങ്കിലും ഇത്രത്തോളം എങ്ങനെ സാധിച്ചുവെന്നായിരുന്നു പലരും പൃഥ്വിരാജിനോട് ചോദിച്ചത്. ആടുജീവിതത്തിന്റെ അവസാന ഷെഡ്യൂളില്‍ അഭിനയിക്കുന്നതിന് മുന്നോടിയായി സിനിമയില്‍ നിന്നും മൂന്ന് മാസത്തെ അവധിയെടുത്തിരിക്കുകയാണ് താരം ഇപ്പോൾ . ഇതാദ്യമായാണ് ഇത്രയും നാള്‍ പൃഥ്വിയെ വീട്ടില്‍ കിട്ടുന്നതെന്നായിരുന്നു സുപ്രിയഅഭിപ്രായപ്പെട്ടത്. താടിക്കാരന്‍ വീട്ടിലെത്തിയതിന്റെ സന്തോഷം പങ്കുവെച്ചും താരപത്‌നി എത്തിയിരുന്നു. വീട്ടിലിപ്പോള്‍ ചെലവ് വളരെ കുറവാണെന്നും സുപ്രിയയും ഡയറ്റിലാണെന്നും കഴിക്കാനുള്ള ഒരേയൊരാള്‍ അലംകൃതയാണെന്നും നടൻ പറഞ്ഞിരുന്നു. ലിസ്റ്റിന്‍ സ്റ്റീഫന്റെ മകളുടെ മാമോദീസയില്‍ കൂടുതൽ തിളങ്ങിയത് പൃഥ്വിയും സുപ്രിയയുമായിരുന്നു.

ട്രാഫിക്ക് എന്ന ചിത്രത്തിലൂടെയായിരുന്നു ലിസ്റ്റിന്‍ സ്റ്റീഫനെന്ന പേര് മലയാളികള്‍ക്ക് പരിചിതമായത്. കെട്ട്യോളാണ് എന്റെ മാലാഖ, ഡ്രൈവിംഗ് ലൈസന്‍സ് തുടങ്ങിയ സൂപ്പർ ഹിറ്റ് സിനിമകള്‍ നിര്‍മ്മിച്ചത് അദ്ദേഹമാണ്. പൃഥ്വിരാജും കുടുംബവുമായി അടുത്ത സൗഹൃദമാണ് ലിസ്റ്റിനുള്ളത്. താനും ഭാര്യയും കഴിഞ്ഞാല്‍ അലംകൃത ഏറ്റവും കൂടുതല്‍ കാണുന്നത് ലിസ്റ്റിന്‍ സ്റ്റീഫനെയാണെന്നായിരുന്നു പൃഥ്വിരാജിന്റെ കമന്റ്. ലിസ്റ്റിന്റെ മകളെക്കാണാനായി വേദിയിലേക്ക് എത്തിയപ്പോഴായിരുന്നു താരം ഇങ്ങനെ പറഞ്ഞത്. നരേന്‍, മിത്ര കുര്യന്‍, പ്രയാഗ മാര്‍ട്ടിന്‍, ജോബി ജോര്‍ജ് തുടങ്ങി നിരവധി പേരാണ് പരിപാടിയില്‍ പങ്കെടുത്തത്. പരിപാടിയുടെ വീഡിയോ സോഷ്യല്‍ മീഡിയയിൽ വൈറലായിക്കൊണ്ടിരിക്കുകയാണ്.

താരമായിട്ടോ സിനിമാക്കാരനായിട്ടോ അല്ല താന്‍ ഇവിടെ വന്നത് . വീട്ടില്‍ തന്നേയും ഭാര്യയേയും കഴിഞ്ഞാല്‍ മോള്‍ ഏറ്റവും കൂടുതല്‍ കണ്ടിട്ടുള്ള മുഖം ലിസ്റ്റി്‌ന്റേയാണ്. ഒരു കുടുംബാംഗത്തെപ്പോലെയായാണ് താന്‍ ഈ ചടങ്ങിനേക്ക് എത്തിയത്. ലിസ്റ്റിന്റെ ജീവിതത്തില്‍ ഏറ്റവും കൂടുതല്‍ ഐശ്വര്യങ്ങള്‍ സമ്മാനിച്ചവരാണ് ലിസ്റ്റിന്റെ ഭാര്യയും മോനും. അത് കൂടാതെ മോളിലൂടെയും കൂടുതല്‍ ഐശ്വര്യം ലഭിക്കട്ടെ. ദൈവകൃപ കൊണ്ട് കുഞ്ഞിന് അമ്മയുടെ രൂപം ലഭിച്ചു. ഈ സുന്ദരിയെ അനുഗ്രഹിക്കാന്‍ ഇവിടെയെത്താന്‍ കഴിഞ്ഞതില്‍ ഒരുപാട് സന്തോഷമുണ്ടെന്നും താരം കൂട്ടിച്ചേർത്തു.