സുരാജ് വെഞ്ഞാറമ്മൂടിനെ ഒരു താരമെന്നതിനേക്കാള്‍ നമ്മളില്‍ ഒരാളായി കാണാനാണ് മലയാളികള്‍ക്ക് പ്രിയം. എത്ര തിരക്കുകള്‍ക്ക് ഇടയിലും ആരാധകരുമായി സംവദിക്കാന്‍ സമയം കണ്ടെത്തുന്ന ചുരുക്കം ചില അഭിനേതാക്കളില്‍ ഒരാളാണ് സുരാജ്. എന്നാല്‍, ഒരു ആരാധകന്‍ തന്നെ പറ്റിച്ചിട്ടുണ്ടെന്നും അദ്ദേഹം പറഞ്ഞു. ആ കഥ ഇങ്ങനെ...

പാലക്കാട് ഒരു ഹോട്ടലില്‍ വച്ച് ഒരു ദിവസം ഒരാള്‍ സുരാജിന്റെ ദശമൂലം ദാമു എന്ന കഥാപാത്രത്തിന്റെ ഫോട്ടോ വരച്ചുകൊണ്ടുവന്ന് റിസപ്ഷനിലേല്‍പ്പിച്ചു. സുരാജ് ഷൂട്ട് കഴിഞ്ഞ് തിരികെ വരുമ്പോള്‍ ഏല്‍പ്പിക്കണമെന്ന് ആവശ്യപ്പെടുകയും ചെയ്തു. വിരോധമില്ലെങ്കില്‍ ഒന്ന് നേരിട്ട് കാണാന്‍ അവസരം ഒരുക്കണമെന്ന് റിസപ്ഷനിലുള്ളവരോട് അഭ്യര്‍ഥിക്കുകയും ചെയ്തിട്ടാണ് അയാള്‍ പോയത്.

അയാള്‍ വരച്ച ഫോട്ടോകള്‍ കണ്ട ശേഷം സുരാജ് അയാളെ വിളിപ്പിച്ചു. കുശാലാന്വേഷണ ശേഷം ഒരു ഫോട്ടോ ആയാലോ എന്നായി അയാള്‍. ദിവസേന നിരവധി ആളുകള്‍ കാണാന്‍ വരുകയും ഒപ്പം നിന്ന് ഫോട്ടോ എടുക്കുകയും ചെയ്യുന്നതിനാല്‍ സുരാജ് എതിരൊന്നും പറഞ്ഞില്ല. അയാളുടെ ഒപ്പം നിന്ന് ഫോട്ടോ എടുക്കാന്‍ തയ്യാറായ സുരാജിനോട് അയാള്‍ തന്റെ ആവശ്യം വെളിപ്പെടുത്തിയത് കേട്ടപ്പോള്‍ സുരാജിന് ചിരിവന്നു.

അയാളുടെ ഫോട്ടോ സുരാജ് എടുത്തു കൊടുക്കണമെന്നാണ് അയാളുടെ ആഗ്രഹമത്രേ. സുരാജ് വെഞ്ഞാറമ്മൂട് എടുത്തത് എന്ന് പറഞ്ഞു സോഷ്യല്‍മീഡിയയില്‍ ഇടുക എന്നതാണ് പുള്ളിയുടെ ആഗ്രഹം. ആഗ്രഹപ്രകാരം സുരാജ് ഫോട്ടോ എടുത്തുകൊടുത്തുവത്രേ.

ആരാധകന്‍ തന്ന ഈ ചെറിയ പണി താന്‍ ആസ്വദിച്ചെന്നാണ് സുരാജ് പറയുന്നത്.