നടന്‍ ബാലു വര്‍ഗീസും നടിയും മോഡലുമായ എലീന കാതറിനും വിവാഹിതരായി. ബാലുവിന്റെയും എലീനയുടെയും സുഹൃത്തുക്കളും കുടുംബാംഗങ്ങളും നിറഞ്ഞതായിരുന്നു വിവാഹ വേദി. ആസിഫ് അലി ഭാര്യ സമയ്ക്കും മകനും ഒപ്പം ആണ് വിവാഹചടങ്ങില്‍ പങ്കെടുത്തത് . ചലച്ചിത്രതാരം ഗണപതിയും ചടങ്ങില്‍ എത്തിയിരുന്നു . നടൻ അര്‍ജുന്‍ അശോകനും കുടുംബ സമ്മതമാണ് വിവാഹത്തിന് എത്തിയത്.

ബാലുവും എലീനയും ഏറെ നാളുകളായി പ്രണയത്തിലായിരുന്നു. ആസിഫ് അലിയും ഐശ്വര്യ ലക്ഷ്മിയും നായികാ നായകന്മാരായെത്തിയ സൂപ്പർ ഹിറ്റ് ചിത്രം വിജയ് സൂപ്പറും പൗര്‍ണമിയും എന്ന ചിത്രത്തില്‍ ഇരുവരും ഒരുമിച്ചഭിനയിച്ചിരുന്നു.

കഴിഞ്ഞ മാസം എലീനയുടെ പിറന്നാളാഘോഷ ദിനത്തില്‍ ബന്ധുക്കളുടെയും സുഹൃത്തുക്കളുടെയും സാന്നിധ്യത്തില്‍ ആണ് ബാലു എലീനയെ പ്രൊപ്പോസ് ചെയ്തത്. ഇതിന്റെ സന്തോഷം പ്രകടിപ്പിച്ച് എലീന ഇന്‍സ്റ്റഗ്രാമില്‍ പങ്കുവച്ച പോസ്റ്റിലൂടെയാണ് പ്രണയം പുറത്തറിയുന്നത്. ജനുവരിയിൽ ഇരുവരുടെയും വിവാഹ നിശ്ചയവും നടന്നിരുന്നു.

ലാല്‍ ജോസ് ചിത്രം ചാന്തുപൊട്ടിലൂടെ അഭിനയരംഗത്തേക്കെത്തിയ ബാലു ഇതിനോടകം നാല്‍പതോളം ചിത്രങ്ങളില്‍ അഭിനയിച്ചിട്ടുണ്ട്. ഹണീ ബീ, കിംഗ് ലയര്‍, കവി ഉദ്ദേശിച്ചത്, ഇതിഹാസ, വിജയ് സൂപ്പറും പൗര്‍ണമിയും തുടങ്ങിയ ചിത്രങ്ങളില്‍ ശ്രദ്ധേയ വേഷങ്ങള്‍ അവതരിപ്പിച്ചിരുന്നു. റിയാലിറ്റി ഷോയിലൂടെയാണ് എലീന മോഡങ്ങിലേക്കെത്തുന്നത്. തുടര്‍ന്ന് ചില ചിത്രങ്ങളില്‍ ശ്രദ്ധേയമായ വേഷങ്ങള്‍ അഭിനയിച്ചു.