തെന്നിന്ത്യൻ പ്രേക്ഷകരുടെ പ്രിയതരമാണ് അമലാപോൾ. നടി എന്ന നിലയിൽ മാത്രമല്ല വ്യക്തമായ നിലപാടുകൾ ഉള്ള വ്യക്തി എന്ന നിലയിലും അമലാപോൾ ശ്രദ്ധ നേടാറുണ്ട്. വ്യത്യസ്തമായ കഥാപാത്രങ്ങളായിരുന്നു അമലയ്ക്ക് പ്രേക്ഷക സ്വീകാര്യത നേടാനുള്ള കാരണം. ഇപ്പോഴിതാ താരം തന്റെ വിവാഹമോചനത്തെ കുറിച്ചും ആ സമയത്തെ തന്റെ മാനസികാവസ്ഥയെ കുറിച്ചും മനസ് തുറക്കുകയാണ്.

അമലയുടെ പുതിയ ചിത്രമായ പിറ്റ കതലു റിലീസിന് തയ്യാറെടുത്തുകൊണ്ടിരിക്കുകയാണ്. തെലുങ്ക് ആന്തോളജി ചിത്രത്തില്‍ മീര എന്ന കഥാപാത്രമായാണ് അമല അഭിനയിക്കുന്നത്. പുതിയ ചിത്രത്തിന്റെ പ്രൊമോഷന്‍ പരിപാടിക്കിടെയായിരുന്നു അമല വിവാഹ മോചനത്തെക്കുറിച്ച് മനസ്സ് തുറന്നത്.

2016ൽ ആയിരുന്നു അമലയുടെ മുൻ ഭർത്താവും സംവിധായകനുമായ വിജയുമായുള്ള വിവാഹമോചനം. ഇതിനെ കുറിച്ചായിരുന്നു അമല സംസാരിച്ചത്. മലയാള സിനിമയായ നീലത്താമരയിലൂടെ അഭിനയ രംഗത്തിലേക്ക് താരം അരങ്ങേറിയത്. എന്നാൽ, കുറച്ചു വർഷമായി മലയാള സിനിമയിൽ നിന്നും മാറിനിൽക്കുകയാണ് അമല.

''യഥാര്‍ത്ഥ ജീവിതത്തിന്റെ പ്രതിഫലനമാണ് മീര. വിവാഹജീവിതത്തിലെ പ്രശ്‌നങ്ങളിലൂടെ കടന്നു പോകുന്ന സ്ത്രീയ്ക്ക് പിന്തുണ നല്‍കുന്നൊരു സംവിധാനം നിലവിലില്ല. താൻ വേര്‍പിരിയലിലൂടെ കടന്നു പോയപ്പോള്‍
തന്നെ പിന്തുണയ്ക്കാന്‍ ആരും വന്നതായി എനിക്കോര്‍മ്മയില്ല. എല്ലാവരും എന്നില്‍ ഭയം വളര്‍ത്താന്‍ ശ്രമിക്കുകയായിരുന്നു. ഞാന്‍ ഒരു പെണ്‍കുട്ടി മാത്രമാണെന്ന് ഓര്‍മ്മപ്പെടുത്തി'' അമല പോൾ വ്യക്തമാക്കുകയുണ്ടായി.

''വിജയം കൈവരിച്ചൊരു അഭിനേതാവ് കൂടിയായിട്ടു കൂടി ഒരു പുരുഷന്‍ തനിക്കൊപ്പം ഇല്ലെങ്കില്‍ താന്‍ ഭയപ്പെടണമെന്ന് അവര്‍ പറഞ്ഞു. തന്റെ കരിയര്‍ താളം തെറ്റുമെന്നും സമൂഹം പുച്ഛത്തോടെ നോക്കുമെന്നും മുന്നറിയിപ്പു നല്‍കി. ആരും തന്റെ സന്തോഷമോ മാനസികാരോഗ്യമോ കണക്കിലെടുത്തില്ല, അതിനെ കുറിച്ച് ആശങ്കപ്പെട്ടതുമില്ല'' എന്നും അമല കൂട്ടി ചേർത്തു.

എന്നാല്‍ അഡ്ജസ്റ്റ് ചെയ്ത് മുന്നോട്ട് പോകാന്‍ താന്‍ തയ്യാറായിരുന്നില്ലെന്ന് അമല പറഞ്ഞു. ജീവിതം എങ്ങനെ ആകണമെന്നും താനാണ് തീരുമാനിക്കുന്നത്, മോശമായ ഒരു ബന്ധത്തോട് അഡ്ജസ്റ്റ് ചെയ്യാന്‍ മറ്റൊരു സ്ത്രീയ്ക്ക് മുന്നിലുള്ള മാതൃകയായി തന്റെ പേര് വരരുതെന്നും താൻ ആഗ്രഹിച്ചതായി പറയുകയുണ്ടായി.

നെറ്റ്ഫ്‌ളിക്‌സിന്റെ ഹിന്ദി ആന്തോളജി ചിത്രമായ ലസ്റ്റ് സ്‌റ്റോറീസിന്റെ തെലുങ്ക് പതിപ്പാണ് താരത്തിന്റെ പുതിയ ചിത്രമായ പിറ്റ കാതലു. ഹിന്ദിയില്‍ കിയാര അദ്വാനി പ്രധാന വേഷത്തിലെത്തിയ കഥയുടെ തെലുങ്ക് പതിപ്പിലാണ് അമല അഭിനയിച്ചത്.

ആടൈ, കുട്ടി സ്റ്റോറി എന്നിവയാണ് അമലയുടെ ഒടുവിലിറങ്ങിയ ചിത്രങ്ങള്‍. നിരവധി സിനിമകള്‍ അണിയറിയില്‍ തയ്യാറെടുപ്പിലാണ്. അതോ അന്ത പറവൈ പോലെ, ആടുജീവിതം തുടങ്ങിയ സിനിമകള്‍ അമലയുടേതായി റിലീസ് ചെയ്യാനുണ്ട്.

മലയാള സിനിമയിൽ 2009ൽ എത്തിയ അമല വർഷങ്ങൾ കഴിഞ്ഞപ്പോൾ തെന്നിന്ത്യൻ സിനിമാ ലോകത്തെ അഭിവാജ്യ ഘടകമായി മാറുകയായിരുന്നു. അച്ചായൻസിലായിരുന്നു അമല അവസാനമായി മലയാളത്തിൽ അഭിനയിച്ചത്.