മലയാള സിനിമയ്ക്ക് ഒരു വനിതാ സംവിധായിക കൂടി. ലെന സംവിധായികയാകുന്നു. സംവിധാനം ചെയ്യുക എന്നത് ലെനയുടെ വലിയ സ്വപ്‌നങ്ങളിലൊന്നാണ്. അതിന് നല്ല പഠനവും സമയവും ആവശ്യമാണ്. അതിനാല്‍ അതിനുള്ള തയ്യാറെടുപ്പിലാണ് താരം. പലരും പറയുന്നുണ്ട് ഹിന്ദിയില്‍ അഭിനയിച്ചതോടെ ലെനയ്ക്ക് തലക്കനം കൂടി മലയാളസിനിമകളൊന്നും കമ്മിറ്റ് ചെയ്യുന്നില്ല, വിളിച്ചാല്‍ ഫോണ്‍ എടുക്കുന്നില്ല എന്നൊക്കെ. എന്നാല്‍ സത്യം അതല്ലെന്ന് താരം പറഞ്ഞു. സിനിമ ചെയ്യുമ്പോള്‍ അതിന്റേതായ സീരിയസ്‌നെസ് വേണം നമ്മുടെ ഇന്‍ഡസ്ട്രിയില്‍ ചിലര്‍ക്ക് ഇല്ലാത്തതും അതാണെന്നും താരം വ്യക്തമാക്കി.
സിനിമയുടെ പണിപ്പുരയ്ക്കായി ബാംഗ്ലൂരിലെ ഫഌറ്റില്‍ കഴിയുകയാണ് ലെന. തിരക്കഥാ ചര്‍ച്ച പുരോഗമിക്കുന്നു. താരങ്ങളെയോ മറ്റ് സാങ്കേതിക പ്രവര്‍ത്തകരെയോ തീരുമാനിച്ചിട്ടില്ല. സീരിയലിലും സിനിമയിലും അഭിനയിക്കുമ്പോഴും സിനിമയുടെ സാങ്കേതിക വശങ്ങള്‍ മനസിലാക്കുന്നതില്‍ ലെ അഥീവ താല്‍പര്യം കാണിച്ചിരുന്നു. തിരക്കഥയുടെ ചര്‍ച്ചകളിലും പങ്കെടുത്തിട്ടുണ്ട്. പലപ്പോഴും അടുത്ത ദിവസം അഭിനയിക്കാനുള്ള സീനുകള്‍ റൂമില്‍ കൊണ്ടുപോയി വായിച്ച് മനസിലാക്കുന്ന രീതിയും താരത്തിനുണ്ടായിരുന്നു.
കെ.ആര്‍ വിജയയും ഷീലയും സിനിമ സംവിധാനം ചെയ്തിട്ടുണ്ട്. അതിന് ശേഷം ആദ്യമായാണ് പുതുതലമുറയിലെ ഒരു നടി ക്യാമറയ്ക്ക് പിന്നിലേക്ക് തിരിയുന്നത്. അഞ്ജലിമേനോനും ശ്രീബാലാ കെ.മേനോനും ശേഷം മലയാളത്തിന് ഒരു വനിതാ സംവിധായകികയെ കൂടി കിട്ടുന്നു. ഇവരെ കൂടാതെ ചില വനിതാ സംവിധായകര്‍ ചില സിനിമകള്‍ ചെയ്തിട്ടുണ്ടെങ്കിലും അതൊന്നും സിനിമകളുടെ ഗണത്തില്‍ പെടുത്താനൊക്കില്ല. തിലോത്തമയൊക്കെ അതിന് ഉദാഹരണമാണ്. ഹിന്ദിയിലൊക്കെ ഫറാഖാനെ പോലെ സൂപ്പര്‍ഹിറ്റ് സംവിധായകരാണ് ഉള്ളത്.