സാമൂഹ്യ ഇടപെടലുമായി വീണ്ടും ജയസൂര്യ. റോഡുകളുടെ ശോചനീയാവസ്ഥ ചൂണ്ടിക്കാട്ടി സ്വന്തം അനുഭവം വിശദീകരിച്ച് മുഖ്യമന്ത്രി പിണറായി വിജയന് നടന്‍ ജയസൂര്യയുടെ വീഡിയോ മെസ്സേജ്. ഗതികേടു കൊണ്ടാണ് താന്‍ ഇങ്ങനെയൊരു വീഡിയോ സന്ദേശം അയക്കുന്നത്. പ്രതിദിനം കുഴികളില്‍ വീണ് നിരവധി പേരാണ് അപകടങ്ങളില്‍ പെടുന്നത്. മുഖ്യമന്ത്രിയ്ക്ക് ജനങ്ങളോട് സ്‌നേഹമുണ്ടെങ്കില്‍ തീര്‍ച്ചയായും ഇതിനൊരു പരിഹാരം ഉണ്ടാക്കണമെന്ന് അഭ്യര്‍ത്ഥിച്ചാണ് ജയസൂര്യ വീഡിയോ സൈന്‍ ഓഫ് ചെയ്യുന്നത്. 53 സെക്കന്റ് ദൈര്‍ഘ്യമുള്ള ഫെയ്‌സ്ബുക്ക് വീഡിയോയിലാണ് ജയസൂര്യയുടെ അഭ്യര്‍ത്ഥന.
ജയസൂര്യയുടെ വീഡിയോയിലെ സംഭാഷണത്തിന്റെ പൂര്‍ണരൂപം താഴെ
ബഹുമാനപ്പെട്ട മുഖ്യമന്ത്രി അറിയുന്നതിന്. സാറിനെ നേരിട്ട് കണ്ടപ്പോള്‍ പറയാന്‍ പറ്റാത്ത ഒരു കാര്യമുണ്ട്. അന്ന് സാറും തിരക്കിലായിരുന്നു. ഗതികേടുകൊണ്ടാണ് സര്‍ ഇങ്ങനെയൊരു വീഡിയോ മെസേജ് അയക്കുന്നത്. കാരണം ഇന്ന് രാവിലേയും പുറത്തേക്ക് ഇറങ്ങിയപ്പോള്‍ ഒരു ചെറുപ്പക്കാരന്‍ റോഡിലേക്ക് വീണ കാഴ്ച്ചയും അവന്റെ കൈ ഒടിഞ്ഞ കാഴ്ച്ചയുമാണ് കാണാന്‍ സാധിച്ചത്. അവന്റെ തലയില്‍ ഹെല്‍മെറ്റും ഉണ്ടായിരുന്നു. ഞങ്ങള്‍ക്ക് വേണ്ട അടിസ്ഥാനപരമായ ഒരു കാര്യം എന്താണെന്നു വെച്ചാല്‍ റോഡുകളൊന്ന് ക്ലിയര്‍ ചെയ്ത് തരണമെന്നാണ്. ആളുകള്‍ വീടുകളിലേക്ക് എത്തുന്നത് തന്നെ മണിക്കൂറുകള്‍ക്ക് ശേഷമാണ്. അവര്‍ അവരുടെ വണ്ടികള്‍ എത്രയോ...സര്‍ തന്നെ പത്രത്തില്‍ വായിക്കുന്നുണ്ടാകുമല്ലോ പ്രതിദിനം കുഴികളില്‍ വീണാണ് ഓരോരുത്തര്‍ക്കും അപകടം പറ്റുന്നത്. സറിന് ഞങ്ങളോട് സ്‌നേഹമുണ്ടെങ്കില്‍ തീര്‍ച്ചയായും ഇതിനൊരു പരിഹാരം ഉണ്ടാക്കി തരണമെന്നാണ് ഞങ്ങള്‍ക്ക് പറയാനുള്ളത്.
ഇതാദ്യമായല്ല ജയസൂര്യ റോഡുകളുടെ മോശം അവസ്ഥയെ കുറിച്ച് പ്രതികരിക്കുന്നത്. ടോള്‍ പിരിവിന് പിന്നാലെ ബാക്കി തുകയ്ക്കും പകരം മിഠായി നല്‍കുന്നതിനെതിരെയും, റോഡുകളിലെ കുഴികള്‍ നികത്താത്തതിന് എതിരെയും നേരത്തെയും ജയസൂര്യ ശബ്ദമുയര്‍ത്തിയിരുന്നു.
2013ല്‍ എറണാകുളം മേനക ജങ്ഷനിലെ റോഡിലെ കുഴിയടക്കാന്‍ ജയസൂര്യ നേരിട്ട് മുന്നിട്ടിറങ്ങിയത് വലിയ വാര്‍ത്തയായി. റോഡിലെ ശോചനീയാവസ്ഥ കണ്ട് സ്വന്തം ചെലവില്‍ ഒരു ലോറി മെറ്റല്‍ കൊണ്ടുവന്നിറക്കി സുഹൃത്തുക്കളുമായി ചേര്‍ന്ന് ജയസൂര്യ കുഴിയക്കുകയായിരുന്നു. ഇതിനെതിരെ അന്നത്ത കൊച്ചി കോര്‍പ്പറേഷന്‍ മേയര്‍ ടോണി ചമ്മണിയും പൊതുമരാമത്ത് മന്ത്രി ഇബ്രാഹിം കുഞ്ഞും രംഗത്തെത്തിയത് വലിയ വിവാദമായി. റോഡ് നന്നാക്കാന്‍ ഇറങ്ങും മുമ്പ് അധികൃതരോട് അനുവാദം ചോദിക്കണമണമെന്നായിരുന്നു ടോണി ചമ്മണിയുടെ പ്രതികരണം.

https://www.facebook.com/Jayasuryajayan/videos/681976691956014/