മലയാള സിനിമയിലെ സൂപ്പര്‍ഹിറ്റ് ചിത്രങ്ങളില്‍ ഒന്നായ സമ്മര്‍ ഇന്‍ ബത്‌ലഹേം കണ്ടവരെല്ലാം ചിന്തിക്കുന്ന ഒരു ചോദ്യമുണ്ട്. ജയറാമിന് ആ പൂച്ചയെ അയച്ച കാമുകി ആരായിരിക്കും.
ചിത്രത്തിന്റെ ആരംഭ ഭാഗത്തിലും ക്ലൈമാക്‌സിലുമാണ് ജയറാമിന് കാമുകിയെന്ന് പറയപ്പെടുന്ന നായിക പൂച്ചയെ അയക്കുന്നത്. പൂച്ചയെ അയച്ച കാമുകിയെ കണ്ടെത്താന്‍ ശ്രമിക്കുന്നുണ്ടെങ്കിലും ചിത്രത്തിന്റെ അവസാനഭാഗം വരെ ജയറാമിനും കൂട്ടര്‍ക്കും അതിന് സാധിക്കുന്നില്ല. ഈ സസ്‌പെന്‍സ് തന്നെയായിരുന്നു ചിത്രത്തിന് ഏറെ പ്രേക്ഷക ശ്രദ്ധ നേടി കൊടുത്തത്. സിനിമ റിലീസ് ചെയ്തിട്ട് വര്‍ഷം പതിനെട്ട് കഴിഞ്ഞു. എന്നിട്ടും പ്രേക്ഷകരുടെ മനസില്‍ നിന്നും ആ ചോദ്യം ഇപ്പോഴും മാഞ്ഞു പോയിട്ടില്ല.
അടുത്തിടെ സിബി മലയിലിനോട് ആ സംശയം ഒരു പ്രേക്ഷകന്‍ ചോദിച്ചു, അഞ്ചു പേരില്‍ ആരാണ് ജയറാമേട്ടന്റെ അടുത്തേക്ക് ആ പൂച്ചയെ അയച്ചതെന്ന്. എന്നാല്‍ സിബി മലയിലിന്റെ മറുപടി നിരാശപ്പെടുത്തുന്നതായിരുന്നു. സത്യത്തില്‍ അത് ആരാണെന്ന് തനിക്കും അറിയില്ലെന്നാണ് സിബി ഉത്തരമായി നല്‍കിയത്. തിരക്കഥ എഴുതിയ രഞ്ജിത്ത് ഇക്കാര്യം തന്നോടും ഇതുവരെ പറഞ്ഞിട്ടില്ലെന്നായിരുന്നു അദേഹത്തിന്റെ മറുപടി.
1998ലാണ് സമ്മര്‍ ഇന്‍ ബത്‌ലഹേം റിലീസ് ചെയ്തത്. ജയറാം, മഞ്ജു വാര്യര്‍, സുരേഷ് ഗോപി, കലാഭവന്‍ മണി എന്നിങ്ങനെ വലിയൊരു താരനിര തന്നെയുണ്ടായിരുന്നു ചിത്രത്തില്‍. മോഹന്‍ലാല്‍ അതിഥി വേഷത്തില്‍ എത്തിയ ചിത്രം കൂടിയായിരുന്നു അത്.