സിനിമയിലെ കാസ്റ്റിംഗ് കൗച്ച് വിവാദ നായിക തന്റെ അനുഭവങ്ങളുടെ സത്യസന്ധതയെ ചോദ്യം ചെയ്യുന്നവര്‍ക്കെതിരെ വിരല്‍ ചൂണ്ടുകയാണ്. ഞാന്‍ നേരിട്ട വെല്ലുവിളികളെക്കുറിച്ചും ഉണ്ടായ വേദനയെക്കുറിച്ചും പറയുമ്‌ബോള്‍ തെളിവു കാട്ടാന്‍ പറയുന്നു.എന്തുകൊണ്ട് സണ്ണി ലിയോണിനോട് അത്തരം ചോദ്യങ്ങള്‍ ചോദിക്കുന്നില്ലെന്നും താരം ആക്ഷേപിക്കുന്നു.

ഇത്തരം ചോദ്യങ്ങള്‍ തെലുങ്ക്, തമിഴ് ചലച്ചിത്ര ലോകങ്ങളില്‍ നിന്ന് താന്‍ നേരിട്ട വേദനയെ ഇരട്ടിപ്പിക്കുകയാണ്. സണ്ണി ലിയോണിന്റെ സത്യസന്ധതയെ നിങ്ങള്‍ ചോദ്യംചെയ്യുന്നില്ല. ടോളിവുഡിന്റെ നടപ്പുരീതികളെ മാറ്റാനാണ് താന്‍ ശ്രമിക്കുന്നത്. അതിന് കഴിയുന്നില്ലെങ്കില്‍ ടോളിവുഡിലേക്ക് ഒരു തിരിച്ചുപോക്ക് താന്‍ ആഗ്രഹിക്കുന്നുമില്ല. 

പീഡനത്തിനിരയായ തനിക്ക് നീതി ലഭിക്കുന്നില്ലെന്ന് മാത്രമല്ല മറ്റ് പല കാര്യങ്ങള്‍ ചെയ്തുവെന്നു കാണിച്ച് തന്നെ ജയിലിലടയ്ക്കാനുള്ള ശ്രമമാണ് ഇപ്പോള്‍ നടക്കുന്നത്. തന്നെ വേശ്യയെന്നാണ് പലരും സംബോധന ചെയ്യുന്നത്. മലയാളത്തില്‍ ഒരു നടിക്ക് മോശം അനുഭവത്തിലൂടെ കടന്നുപോകേണ്ടി വന്നപ്പോള്‍ എല്ലാവരും അവരോടൊപ്പം നിന്നിരുന്നു.

എന്നാല്‍ ടോളിവുഡിലും കോളിവുഡിലും ഇതായിരുന്നില്ല സ്ഥിതി. വേട്ടക്കാര്‍ക്കൊപ്പമായിരുന്നു പലരും നിന്നിരുന്നത്. നടികര്‍ സംഘത്തില്‍ നിന്നുപോലും തനിക്ക് നീതി ലഭിച്ചില്ല. എന്റെ തുറന്നുപറച്ചിലുകളെ ബ്ലാക്ക് മെയിലിംഗായി വ്യാഖാനിക്കുകയാണ്.

എന്റെ ലക്ഷ്യം അത്രയും തരം താണതല്ല. സിനിമാ ലോകത്ത് നിലനില്‍ക്കുന്ന ഒരു ദുരാചാരം നിറുത്തലാക്കണം.അതിനായി കാസ്റ്റിങ് കൗച്ചിനെതിരെ താന്‍ ഇനിയും പോരാടുമെന്നും ശ്രീ റെഡ്ഡി ഉറപ്പിച്ചു പറയുന്നു.